Elordada monıtorıng toptary túnde karantın rejımin buzǵan 5 mekemeni anyqtady
NUR-SULTAN. QazAqparat – Elordada monıtorıng toptary túnde karantın rejımin buzǵan 5 mekemeni anyqtady, dep habarlaıdy QazAqparat ákimdik saıtyna silteme jasap.
Elordada shekteý sharalaryn saqtamaýǵa jol bermeý jáne anyqtaý jónindegi monıtorıng toptari kúsheıtilgen rejımde jumys istep jatyr. Eskertýge qaramastan, ákimshilik jaýapkershilikke tartylsa da qalada kásipkerlik sýbektileriniń karantındi buzýy kún saıyn tirkeledi.
Elordada 24 naýryzdan 25-ine qaraǵan túni karantın rejımin buzǵan 5 mekeme anyqtaldy.
Esil aýdanynda «VZletnyı» resto bary men «Shıshka» laýndj bary shekteýge qaramastan tıisti rejımdi buza otyryp jumys istedi.
Mobıldi top osyndaı jaǵdaıdy Almaty aýdanynda ornalasqan «WEST» kompıýter klýbynda tirkedi.
Sonymen qatar, saǵat 00.00-den keıin Saryarqa aýdanyndaǵy «Sreda» resto- ary men «Red House» monsha kesheni kelýshilerge qyzmet kórsetti.
Elordanyń bas sanıtarlyq dárigeriniń qaýlysynda kórsetilgen shekteýdi «Mıata» laýndj bary, sondaı-aq Baıqońyr aýdanynda ornalasqan kafeniń biri saqtamaǵan.
Jınalǵan materıaldar QR ÁQBtK-niń 425-babyna sáıkes ákimshilik sharalar qabyldaý jáne tártip buzýshylardy jaýapkershilikke tartý úshin sanıtarlyq-epıdemıologııalyq baqylaý basqarmasyna joldandy.
Aıta keteıik, elordada koronavırýstyń epıdemıologııalyq jaǵdaıy turaqsyz. Nur-Sultan 10 naýryzdan bastap epıdemıologııalyq jaǵdaı boıynsha «qyzyl» aımaqqa endi. Qala turǵyndary men qonaqtaryna adam kóp jınalatyn oryndarǵa barmaýdy, maska rejımin, áleýmettik qashyqtyqty jáne basqa da sanıtarlyq normalar men talaptardy saqtaýdy keńes etedi.
