Elordada Momyshulynyń kitaptary, hattary men kartalary qoıylǵan kórme ashyldy
ASTANA. KAZINFORM – Astanada Baýyrjan Momyshulynyń kitaptary, hattary men kartalary kórmege qoıyldy.
— Búgingi kórmege mýzeıimizden Baýyrjan Momyshulynyń kúndeligin jáne jaýyngerlik kartasynyń túpnusqasyn alyp kelip otyrmyz. Ol kisi 1945 jyly qańtar aıynan bastap 9-gvardııalyq dıvızııa komandıri boldy, aqpan-naýryz aılarynda urystarǵa qatysty. Bul kartany sol kezde syzǵan eken. Odan bólek kitaptaryn, kúndeligin usyndyq. Baýyrjan atamyz qandaı qıyn kezderde de kúndelik jazýyn toqtatpaǵan. Keıin sol kúndelikterdi negizge ala otyra 20-dan astam kitap jazyp shyqqan. Soǵys jyldary jalpy 38 kúndelikti toltyryp bitken eken. Sonyń bireýin búgin kórmege ákelip otyrmyz, - dedi Ulttyq áskerı-patrıottyq ortalyǵy bastyǵynyń orynbasary, Áskerı-tarıhı mýzeıiniń bastyǵy maıor Dáýlet Qadyrov.
Kórmege sondaı-aq B. Momyshulynyń jeke kúndeligi, 1955-1956 jyldary Kalının qalasynda paıdalanǵan bloknoty, portreti, fotosýretteri jáne batyrdyń erligi týraly jazylǵan kórkem týyndylar men Ekinshi dúnıejúzilik soǵys jaıly tarıhı kitaptar qoıyldy.
— Bul kórmege Baýyrjan Momyshulynyń 32 tomdyq eńbegi qoıyldy. Buryn 30 tom bolatyn, keıingi jyldary tolyqtyrylyp, 32 tomǵa jetkizildi. Sonyń 6 tomy ózi jazǵan hattardan turady. Qazaq ádebıetinde epıstolıarlyq janr kenje damyǵan. Al Baýyrjan Momyshuly osy janrdy shyńdaǵan jazýshylardyń biri. Oǵan osy 6 tomǵa jetetin hattary dálel. Onyń ishine 1930 jyldan bastap ómiriniń sońyna deıin jazylǵan hattar jınaqtalǵan, - deıdi Qoljazbalar jáne sırek kitaptar ulttyq ortalyǵy Ǵylymı zertteý jumystaryn uıymdastyrý bóliminiń jetekshi mamany Gúlsim Bısenova.
Qoljazbalar jáne sırek kitaptar ulttyq ortalyǵynda ashylǵan kórmeni uıymdastyrýǵa QR Qarýly Kúshteri Ulttyq áskerı-patrıottyq ortalyǵy atsalysqan. Shara Uly Jeńistiń 80 jyldyǵy, dańqty qolbasshy, áskerı qaıratker, jazýshy, Keńes Odaǵynyń Batyry Baýyrjan Momyshulynyń týǵanyna 115 jyl tolýyna oraı uıymdastyryldy.
Aıta keteıik, buǵan deıin elordada Baýyrjan Momyshulynyń soǵysta qoldanǵan zattary qoıylǵan kórme ótken edi.