Elordada mobıldi jumyspen qamtý ortalyǵy ashyldy
NUR-SULTAN. QazAqparat – «Atameken» Ulttyq kásipkerler palatasy Nur-Sultan qalasynda eldi jumyspen qamtýǵa arnalǵan 8 mobıldi ortalyq ashpaq, dep habarlaıdy QazAqparat tilshisi. Sonyń biri qaladaǵy «Etalon» saýda-qurylys ortalyǵynyń janyna boı kóteripti. Palata ókilderiniń aıtýynsha, elimizdiń 3 qalasynda dál osyndaı 30 mobıldi ortalyq jumys isteıtin bolady.
Bazar, vokzal sııaqty el kóp shoǵyrlanatyn oryndarda ashylatyn ortalyqtar tańǵy saǵat 9.00-den keshki saǵat 18.00-ge deıin jumys pen kásip izdegen adamdardy qabyldaıtyn bolady. Ortalyq mamandary qolynda dıplomy bolsa da, mamandyǵyna saı jumys tappaı júrgen jandardy bilimine sáıkes jumysqa ornalastyryp, joǵary bilimi joq jandardy kásibı oqý ortalyqtaryna joldaıdy. Al bıznes ashqysy kelgender «Jas kásipker» jáne «Bastaý» jobasy arqyly kásipkerlik qyrlaryn meńgeredi.
«Atameken» ulttyq kásipkerler palatasynyń basqarma tóraǵasynyń birinshi orynbasary Eldar Jumaǵazıev mundaı mobıldi ortalyqtar Nur-Sultan, Almaty jáne Shymkent qalalarynda ashylyp jatqanyn aıtady.
«Elordada 8, Almatyda 12, Shymkentte 10 ortalyq ashyp otyrmyz. Bul ortalyqtyń eń basty ereksheligi jyljymaly etip salynǵanynda. Eger ornalasqan jerinde kelýshiler az bolsa, adam kóp ótetin basqa orynǵa aparyp qoıýǵa bolady. Prezıdent mobıldi qyzmet kórsetý ortalyqtaryn halyqtyń shoǵyrlanǵan jerlerine ornatý týraly tapsyrma bergenin bilesizder. Soǵan baılanysty, «Eńbek» baǵdarlamasy arqyly qarajat bólip, 3 qalada 30 ortalyq ashtyq. Munda negizinen jumyssyzdar men ózin-ózi qamtamasyz etken tulǵalar kómek alatyn bolady», - deıdi Eldar Jumaǵazıev.
Onyń aıtýyna qaraǵanda, «Atameken» palatasy men QR Eńbek jáne halyqty áleýmettik qorǵaý mınıstrliginiń áleýmettiń áljýaz toptaryna arnalǵan bazasy birizdendirilmek.
«Osynda kirgen azamattyń áýeli áleýmettik statýsyn anyqtaımyz. Eger QR Eńbek jáne halyqty áleýmettik qorǵaý mınıstrliginiń bazasynda joq bolsa, sonda engizemiz. Osydan keıin baryp ol kásipkerlik daǵdysyn anyqtaıtyn test tapsyrady. Mejeli upaı alsa, «Jas kásipker» nemese «Bastaý» baǵdarlamasy boıynsha oqyp, 500 myń teńgelik grantqa joba usyna alady. Al kásipkerlikke yntasy joq bolsa, arnaıy bilim alýyna bolady. Ondaı bilim beretin 50-den astam ortalyǵymyz bar. Ol ortalyqtarda oqytylatyn mamandyqtar tizimi jergilikti jerdegi eńbek naryǵyna taldaý jasaý arqyly irikteledi. ıAǵnı, jumys berýshilerge qajet mamandyqtar oqytylady. Mamandyqqa oqý barysynda shákirtaqy tólenedi. Al oqýy aıaqtalǵan soń jumysqa ornalasýyna kómek kórsetiledi», - dedi palata ókili.
Ortalyqqa júgingen turǵyn tek kásipke joldama alyp qana qoımaı, jeke tulǵalyq qasıetterin de damyta alady.
«Kelesi bir bólme ortalyq kómegine júgingen adamnyń jeke tulǵalyq qasıetterin damytý boıynsha kómek kórsetedi. Azamat bizdiń mamandarmen aqyldasa otyryp, aldaǵy 2-3 jylǵa tabysy men áleýmettik statýsyn, bilimin kóterýge arnalǵan jospar qurady. Ortalyq ókilderi sol jospardy oryndaýǵa jol siltep otyrady», - dedi «Atameken» UKP ókili.
QR Eńbek jáne halyqty áleýmettik qorǵaý mınıstriniń orynbasary Aqmádı Sarbasov mundaı ortalyqtar memlekettiń usynǵan múmkindikterin halyqqa jaqyndatatynyn atady.
«Halyqqa belsendi qyzmet kórsetý formaty dál ýaqytynda ashylyp otyr. Eldi jumyspen qamtý, maman tapshylyǵyn azaıtý, kásibı baǵdar silteý sııaqty birneshe qyzmetti birdeı atqaratyn ortalyqqa mınıstrlik te qoldaý kórsetedi»' - deli vıtse-mınıstr.
