Elordada mobıldi top jumysy qalaı júrgizilýde

NUR-SULTAN. QazAqparat – Koronavırýs indetiniń órshýine baılanysty maýsym aıynyń basynda elimizdiń Densaýlyq saqtaý mınıstrliginiń úkimimen respýblıka boıynsha dárigerlerden quralǵan arnaıy mobıldi toptar quryldy. Búginde bas qalada 200-den astam mobıldi top jumys isteýde. Sonyń ishinde, Nur-Sultan qalasyndaǵy №4 emhanasynda 8 mobıldi top halyqqa qyzmet kórsetýde, dep habarlaıdy QazAqparat tilshisi.

«Bir mobıldi topta 2 nemese 3 maman bar. Onyń ishinde dáriger, onyń kómekshisi jáne volonter. Jáne bir mobıldi toptyń 3-3,5 myń halyqqa deıin járdem kórsetý múmkindigi bar. Bizdiń emhanada 8 mobıldi top jumys isteıdi, olardyń tańǵy 08:00-den keshki 22:00-ge deıin. Jumys isteýge yńǵaıly bolýy úshin 4 mobıldi top túske deıin kezekshilik etedi, qalǵan 4-i tústen keıin jumysyn bastap keshke deıin atqarady», - dedi Nur-Sultan qalasyndaǵy №4 emhananyń dırektory Lázzat Rysbekova.

Mamannyń málimdeýinshe, atalǵan emhanada 208 patsıentten koronavırýs indeti anyqtalǵan.

«Covid-19 sımptomy 208 adamnan tabyldy, búginde birazy jazylyp shyǵyp, qalǵan 53-i áli de em alyp júr. Sonymen qatar, dárigerlerimiz jazylyp shyqqan patsıenttermen de mindetti túrde baılanysady. Naqty aıtqanda, uıaly telefon, mobıldi qosymsha jáne onlaın baqylaý arqyly jaǵdaıyn bilip, kómek kórsetedi. Koronavırýs indetine shaldyqqan bólek, bizde pnevmonııamen aýyrǵandar bar, olardyń sany 290, olardyń da sany kún sanap azaıyp keledi, qazirgi tańda pnevmonııadan 135 patsıent emdelip júr», - dedi ol.

Emhana basshysynyń sózine sensek, qurylǵanyna 1,5 aı bolǵan mobıldi top óz jumysynyń tıimdiligin kórsetken.

«Mobıldi toptyń qyzmeti tegin jáne patsıentter barlyq qajetti dári-dármektermen qamtamasyz etilýde. Qala boıynsha barlyq emhanalardyń óz mobıldi toptary bar, jalpy elorda boıynsha 200-den astam mobıldi top qyzmet kórsetýge. Árbir emhananyń óz patsıentteri bar, arnaıy tizim jasaqtalǵan sol tizim boıynsha mobıldi top dárigerleri medıtsınalyq kómek kórsetedi», - deıdi L. Rysbekova.