Elordada mobıldi brıgadalar táýlik boıy jumys isteýge kóshti

NUR-SULTAN. QazAqparat – Búginnen bastap Nur-Sultan qalasynyń medıtsınalyq mobıldi top qyzmeti táýlik boıy jumys rejımine kóshti. Bul týraly qalalyq densaýlyq saqtaý basqarmasy basshysynyń orynbasary Álııa Rústemova shtab otyrysynda málim etti, dep habarlaıdy QazAqparat tilshisi.

Búgin elordada qala ákimi Altaı Kólginov, densaýlyq saqtaý mınıstri Ajar Ǵınııat, sol sııaqty densaýlyq saqtaý basqarmasy, emhanalar men ınfektsııalyq statsıonarlar basshylarynyń qatysýymen epıdemıologııalyq ahýal máselelerine arnalǵan qalalyq shtabtyń otyrysy ótti.

Atalǵan jıynda koronavırýs ınfektsııasymen kúres jáne onyń taralýyna jol bermeý máseleleri talqylandy.

Qoǵamdyq densaýlyq saqtaý basqarmasy basshysynyń orynbasary Álııa Rústemova Nur-Sultanda indetti juqtyrýdyń kúrt ósýine baılanysty mobıldi brıgadalar sanynyń 2 esege artqanyn aıtty.

«Epıdemıologııalyq jaǵdaıdyń nasharlaýyna baılanysty 14 qańtardan bastap medıtsınalyq uıymdardyń koll-ortalyqtary men mobıldi brıgadalar táýlik boıǵy jumys rejımine kóshti. Elorda ákimdigi qala turǵyndaryna qyzmet kórsetý úshin qosymsha kólik bólindi. Epıdjaǵdaıdyń nasharlaýyna baılanysty qashyqtan baqylaý jáne KVI anyqtalǵan patsıentterdi aýrýhanaǵa jetkizý jumysy kúsheıtildi», - deıdi ol.

Basqarma bergen málimetke súıensek, búginde qala boıynsha 36 mekemede KVI juqtyrǵan ambýlatorııalyq baqylaý jáne emdeý júrgizedi.

Sondaı-aq, qazirgi ýaqytta 13 myńnan astam KVI juqtyrǵan astanalyq ambýlatorııalyq em alyp jatyr.

Jáne kúnine shamamen 1500 myń naýqas mobıldi brıgada kómegine júginedi.