Elordada «Mıras» halyqaralyq mektebiniń 20 jyldyǵy atalyp ótti
NUR-SULTAN. QazAqparat – Búgin bas qaladaǵy «Mıras» halyqaralyq mektebiniń 20 jyldyq mereıtoıy toılandy, dep habarlaıdy QazAqparat tilshisi.
«Biz búgin «Mıras» halyqaralyq mektebiniń 20 jyldyǵyn atap ótip otyrmyz. Osydan 20 jyl buryn bul jer bos jatqan dala edi. Meniń áli esimde. 1999 jyldyń aqpan aıy, mektep qabyrǵasyn qalaıtyn kúni óte sýyq boldy. Aıazben qosa qatty jel turdy. Sonda meniń anam óziniń oramalyn maǵan japqan «jel ótip ketpesin» dep. Al ákem bolsa qolyma qural men tsementti ustatyp, «Jańa mekteptiń irgesi qalandy, odan ári onyń qurylysy men ilgerileýin saǵan tapsyramyn» dedi. Men sol aıtýly sátte ata-anamnyń qatysyp, qoldaǵanyna qýanyshtymyn. Osydan 20 jyl buryn táýelsiz Qazaqstanda úlken ózgerister oryn alyp, damýdyń alǵashqy satylarynda edik. Sol kezden bastap bizdiń bilim qory elimizdiń órkendeýi jolynda kóptegen maqsat-mindetterdi alǵa qoıyp, oryndaı bildi. Bul mekteptiń negizin qalaýda otandyq jáne sheteldik bilim salasyndaǵy jańashyldyq pen tájirıbe zerttelip, nátıjesinde ózimizdiń erekshe bilim baǵdarlamamyzdy jasap shyǵardyq. Osy jyldar aralyǵynda «Mıras» halyqaralyq mektebinen talaı bilimdi urpaq qanat qaqty», - dedi «Nursultan Nazarbaevtyń bilim qory» qoǵamdyq qorynyń prezıdenti Dınara Qulybaeva.
Aıtýly shara aıasynda oqýshylar men stýdentterdiń STEM jobalary men shyǵarmashylyq jumystarynyń kórmesi uıymdastyrylǵan.
«Bizdiń mekteptiń alǵashqy kirpishin 1999 jyldyń aqpanynda QR Tuńǵysh Prezıdenti, Elbasy Nursultan Nazarbaev pen Dınara Qulybaeva qalaǵan. Sol jyldyń tamyz aıynda mektep paıdalanýǵa berildi. Mektebimiz ashylǵan kúnnen, bizdiń aldymyzǵa halyqaralyq tájirıbeni meńgerý mindeti turdy. Biz óz kezegimizde zertteý jumystaryn júrgize kele, ózindik bilim berý baǵdarlamasyn jasap shyǵardyq. Alǵash ashylǵanda 41 oqýshy oqysa, qazirgi kúni 400 bala bilim alýda. «Mıras» - Qazaqstanda tuńǵysh ret halyqaralyq mártebege ıe bolǵan mektep. 2004 jyly bizdiń mektep bilim salasy boıynsha halyqaralyq agenttiktiń akkredıtatsııasyna ıe boldy. Dál sol jyly halyqaralyq turǵyda bakalavrıat mamanyn daıyndaý quqyǵyna ıe boldyq. Biz balalardy 2 jastan bastap qabyldaımyz. ıAǵnı bizde balabaqshadan bastap barlyq býyn synyptarynda oqý qarastyrylǵan. 2012 jyly resmı túrde QR Úkimetiniń qaýlysymen bizge «halyqaralyq mektep» degen mártebe berildi», - deıdi «Mıras» halyqaralyq mektebiniń dırektory Elena Hamıtova.
Onyń aıtýynsha, qazirgi kúni atalǵan mekteptiń 62 túlegi, álemniń 12 elinde joǵary bilim alyp jatyr.
«Taǵy bir aıtyp ótetin jaıt, bizdiń shetelde bilim alǵan túlekterimizdiń kóbisi elimizge oralyp, Qazaqstannyń damýyna óz úlesterin qosýda. Bizdiń maqsatymyz – bilimdi urpaq tárbıelep qana qoımaı, elge eńbek etetin jeke tulǵa qalyptastyrý. Túlekterge kelsek, ótken jyly 12 oqýshy qanat qaqsa, bıyl 16 bala mektep bitirmek. Barlyǵy 80 muǵalim jumys isteıdi», - dedi ol.
