Elordada «meırimdi qoǵam qurý» ıdeıasy talqylandy
Sharaǵa qatysqan zııaly qaýym ókilderi avtordyń «meırimdi qoǵam qurý» ıdeıasyn talqylady. Jazýshy bul kitabynda qazaq qoǵamyn meıirimdi qoǵamǵa aınaldyrýdyń jáne el astanasy Nur-Sultan qalasyn álemniń eń meıirimdi qalasyna aınaldyrýdyń tujyrymdamalaryn jasaǵanyn aıtady.
«Qazaq halqynyń óne boıy túgel meıirim men qaıyrymǵa toly asyl qazyna, qanynda, mentalıtetinde meıirimniń kúshi, qudyreti, qundylyǵy saqtalǵan halyq. Sóıtip, quldyq júıeniń qalyptastyrǵan qatygezdiginen aıyǵyp, meıirimdilik qatynas arqyly alǵa damýydyń jańa jolyn ózimiz ashamyz. Sol úshin qazaqtyń mentalıtetindegi meıirimdilik qasıetin, qundylyǵyn, qaıyrymdylyǵyn atadan jalǵasqan jaqsy salt-dástúrin Elbasynyń «Rýhanı jańǵyrý» ıdeıasy aıasynda jalǵastyryp, azamattyq qoǵamnyń esigin ashýymyz kerek. Munyń bárin «Meıirimdi qoǵam, memlekettiń qajettiligi, onyń paıdasy» atty eńbegimde barynsha dáleldeýge tyrystym», - deıdi Úzben Qurmanbaıuly.
Al, memleket qaıratkeri Ǵarıfolla Esim bul ıdeıa tek qazaq halqynyń ǵana emes, tyǵyryqqa tirelgen álem halyqtarynyń aldyn ashatyn jol ekeninin alǵa tartady.
«Meıirimdi qoǵam quryp, meıirimdilik zańdylyǵyna baǵyný arqyly ǵana búgingi qıyndyqtyń bárinen shyǵa alamyz. Eger osylaı jasaı almasaq bári beker, alǵa qaryshtap damýdyń ózge joly joq ekeni de túsinikti. Men muny burynan aıtyp kelgenmin. Al, búgin Úzben Qurmanbaıuly taıǵa tańba basqandaı etip aıqyndapty. Endi bizge ne kerek, dál osy kóterilgen máseleni ulttyq ıdeologııa etýimiz kerek. Tipti táýelsizdigimizdiń alǵashqy jyldarynda ekonomıkalyq turǵyda naryq zańdaryn qabyldaǵandaı rýhanı turǵyda meıirimdilik zańdylyǵyn tý etýimiz kerek edi. Bul ıdeıa tek qazaq halqynyń ǵana emes, tyǵyryqqa tirelgen álem halyqtarynyń aldyn ashatynyna senimdimin. Tyńnan kóterilgen bul ıdeıany Elbasy, Prezıdentten bastap búkil halyq qoldaý emes, týra iske asyrýymyz qajet», - deıdi Ǵarıfolla Esim.
Jazýshy Jádı Shákenuly «meıirimdi qoǵam» ıdeıasy keshegi babalarymyzdyń armany ekendigin aıtady.
«Meıirimdi qoǵam – bul keshegi ótken ál-Farabı, Asan qaıǵy, Abaı syndy babalarymyzdyń armany. Eger Prezıdentimiz barlyq laýazym ıelerin meıirimdi bolýǵa shaqyryp, adamdarmen meıirimdilik aıasynda qatynasýdy tapsyrsa, sol kúnnen bastap qoǵam ońalady. Meıirimdilik zańdylyǵy ǵana bárin ońaıtyny, túzeıtini, halyqty baı, baqýatty etetini ómir shyndyǵy», -deıdi jazýshy.
Aıta keteıik sharany uıymdastyrýǵa «Otandastar qory» qoldaý bildirgen.
«Bıyl el táýelsizdigimen birge kóshi-qonnyń bastalǵanyna 30 jyl tolyp otyr. Elge kelgen mıllıonnan astam qandasymyz ár salada óz úlesin qosyp júr. Osyǵan oraı «Otandastar qory» «Qandaspen kelgen qazyna» atty jańa joba bastaǵan bolatyn. Bul joba elge kelip eńbegi sińgen tulǵalardy tanystyrý solardyń elge sińirgen eńbegin kórsetý. Búgingi sharada osy úlken jobanyń bastamasy», - deıdi «Otandastar qorynyń» vıtse-prezıdenti Maǵaýııa Sarbasov.
