Elordada menshiginde 67 páteri bar adam turady
NUR-SULTAN. QazAqparat - Nur-Sultan qalasynyń turǵynynda bir turǵyn úı kesheninde 65 páteri bar. Jalpy, onyń menshiginde - 67 páter. Kórsetilgen turǵyn úılerdi jalǵa berý faktisi tekserilýde, dep habarlaıdy QazAqparat tilshisi.
QR QM Memlekettik kirister komıteti Baqylaý departamenti dırektorynyń mindetin atqarýshy Ánýar Súleımenov Memlekettik kirister komıteti kóleńkeli ekonomıkaǵa qarsy kúres sheńberinde páterdi zańsyz jalǵa berýshilerdi anyqtaý jumystaryn jalǵastyryp jatqanyn aıtady.
«Vedomstvo qyzmetkerleri ártúrli memlekettik aqparattyq júıelerdiń derekteri men basqa aqparat kózderin paıdalanady. Bul PIK málimeti, sanaly azamattar men kórshilerden túsken aqparat bolýy múmkin», - dedi Á.Súleımenov.
Aldyn ala jasalǵan qorytyndyǵa sáıkes, qazirgi ýaqytta 3 jáne odan da kóp páterge menshik quqyǵy bar, alaıda jeke kásipker retinde tirkelmegen jáne tıisti salyqtar tólemegen 20 myńnan astam tulǵa anyqtalǵan. Olardyń arasynda 10-nan astam páterge menshik quqyǵy bar 150 tulǵa bar. Munan bólek bir tulǵanyń ıeliginde bir turǵyn úı kesheninde 65 páteri bar. Joǵaryda keltirilgen derekter jalǵa berilýine egjeı-tegjeıli taldaý júrgiziletin qashyqtyqtan monıtorıng jasaý arqyly alynǵan.
Jalpy, 2019 jyldyń 5 aı ishinde júrgizilgen jumys nátıjeleri boıynsha jeke kásipker retinde 7 403 jeke tulǵa tirkeldi. Bul byltyrǵy jylmen salystyrǵanda 22 paıyzǵa nemese 1320 jeke tulǵaǵa kóp. Salyqtyq túsim somasy 37 paıyzǵa ósti jáne 7 252,1 mln teńgeni quraıdy.
