Elordada «Meniń súıikti dárigerim» aktsııasy ótip jatyr
ASTANA. QazAqparat - Búgin dúnıejúzilik gepatıtke qarsy kúres kúnine oraı QR Prezıdenti Іs Basqarmasy medıtsınalyq ortalyǵynyń aýrýhanasynda «Meniń súıikti dárigerim» atty aktsııa uıymdastyrdy, dep habarlaıdy QazAqparat tilshisi.
DDU ótken jylǵy jarııalaýy boıynsha álemde gepatıttiń sozylmaly vırýsyn tasymaldaýshy 325 mıllıon adam bar, ıaǵnı jer betindegi árbir 20-synshy adam gepatıttiń belgili bir túrimen aýyrady.
Qazaqstanda da ózge elderdegideı baýyr aýrýy áli kúnge deıin áleýmettik mańyzy bar aýrýlardyń qatarynda, sebebi bul vırýsty kez kelgen adamnyń juqtyrý qaýpi joǵary.
Gepatıttiń A jáne E túrleri adam aǵzasyna taǵam, sý arqyly enedi. Al V,S jáne D gepatıtteri qan jáne jynystyq baılanys arqyly beriledi. Sońǵylardyń A gepatıtinen aıyrmashylyǵy adam aǵzasyna ene tura, eshqandaı belgi bermeı sozylmaly túrge aınalý qaýpi bar. Ýaqyt óte kele onyń arty baýyr tserrozy men baýyrdyń qaterli isigine aparady.
Densaýlyq saqtaý mınıstrliginiń málimetinshe Qazaqstanda gepatıttiń sozylmaly túrimen 50 myń adam naýqastanǵan.
QR PІB MO aýrýhanasynyń bas gastroenterology Baqytjan Beıimbetovtiń aıtýynsha, syrqattanýshy atalǵan vırýsty juqtyryp, bilmeı júre berýi múmkin. Mysaly S gepatıti adam aǵzasyna eshqandaı belgisin baıqatpaıdy.
«Kóp jaǵdaıda atalǵan vırýstyń aǵzaǵa juqqany basqa aýrýlardy tekserý barysynda anyqtalady. Mysaly adam dárigerdiń qabyldaýyna alǵash kelip tur, biraq onda gepatıttiń vırýsy áldeqashan bar nemese asqynyp ketken. Statıstıkaǵa súıensek Qazaqstanda kóbinese Túrkistan, Jambyl jáne Qyzylorda oblystarynda gepatıtpen aýrýdyń kóp jaǵdaıy tirkeledi. Bunyń ártúrli sebepteri bar sonyń biri qan quıý jáne qan almastyrý kezinde oryn alady»,- dedi ol.
Odan bólek dárigerdiń aıtýynsha S gepatıtine qarsy ekpe (vaktsına) áli kúnge deıin tabylmaı otyr. Al V gepatıti kóbinese 20-49 jas aralyǵyndaǵylarda kezdesedi. Eger ýaqtyly vaktsına alǵan jaǵdaıda ımmýnıtet 98% qalyptasady. Sondyqtan atalǵan aýrýdyń aldyn alýdyń tıimdi joly dárigerge der kezinde tekserilý jáne dıagnostıkadan ótý, - dep atap ótti dáriger.
Osyǵan oraı, búgin atalǵan medıtsınalyq uıym «Meniń súıikti dárigerim» atty aktsııa ótkizdi. Atalǵan sharada elordalyqtar gepatıtke qatysty bilikti mamandardyń keńesin alyp jatyr.
