Elordada «Meniń atym Qoja» keıipkerine eskertkish ornatyldy
NUR-SULTAN. QazAqparat – Erteń elordada «Meniń atym Qoja» shyǵarmasynyń keıipkerine ornatylǵan eskertkish resmı ashylady. Bul týraly QazAqparat tilshisine ákimdiktiń baspasóz qyzmeti habarlady.
Shara Qazaqstandaǵy «Balalar jyly» aıasynda uıymdastyrylǵan.
1963 jyly «Meniń atym Qoja» shyǵarmasy jelisimen «Qazaqfılm» stýdııasy túsirgen balalar fılmindegi Qoja keıipkerine ornatylǵan eskertkishtiń jalpy bıiktigi 183 sm, qola, granıt materıaldarynan jasalǵan. Ideıanyń avtory Murat Qojamqulov, músinshi Talaphan Azamat.
Aıta ketsek, «Meniń atym Qoja» - 1957 jyly jazylǵan, qazaq balalar ádebıetiniń ozyq týyndylarynyń biri sanalatyn povest. Avtory – balalar ádebıetiniń klassıgi Berdibek Soqpaqbaev. Ol orys, ýkraın, frantsýz, lıtva, latysh, ózbek tilderine aýdarylǵan. 1963 jyly «Qazaqfılm» stýdııasynyń osy shyǵarmasy boıynsha jazylǵan kınostsenarıı ekranǵa shyqty.
Eskertkishtiń resmı ashylýy erteń saǵat 11.00-de «Jetisý» saıabaǵynda ótedi.
