Elordada «Men sezemin» atty kórme ótip jatyr
ASTANA. QazAqparat - Búgin Astanada «Rýhanı jańǵyrý» baǵdarlamasynyń aıasynda adamdardan zábir kórgen janýarlarǵa qatysty problemany arqaý etken «Men sezemin» atty jyl saıynǵy qaıyrymdylyq kórmesi óz jumysyn bastady, dep habarlaıdy elorda ákimdiginiń resmı saıty.
Qaladaǵy jahandyq ózgeristerdiń negizinde azamattyq bastamalar jatqandyqtan, erekshe kórmege Astana qalasynyń ákimdigi qoldaý kórsetýde.
Eriktilerdiń jumysy - belsendi ómirlik ustanymnyń, qala men onyń turǵyndarynyń taǵydyryna degen jaýapkershiliktiń mańyzdy belgisi. Qoǵam úshin ózekti máselelerdi sheshý «ózgeristi ózińnen basta» qaǵıdasy boıynsha sanany jańǵyrtýdan, al Otanǵa degen mahabbat ár azamattyń áleýmettik jaýapkershiligin tanytýynan bastalady. «Rýhanı jańǵyrý» baǵdarlamasynyń «Atameken» baǵyty da osy qaǵıdany negiz etken.
«Keruen city» saýda ortalyǵynda uıymdastyrylǵan fotokórmede kelýshiler nazaryna Rýslan Hasanov, Tımýr Jumatov, Elena Sycheva, Irına Ahmadıeva, Lılııa Batreeva, Sánııa Qudaıqulova, Anar Maıkopova, Elena Polıakova sııaqty elordaǵa aty tanys 9 sýretshiniń jumystary qoıylǵan. Ár sýrettiń negizinde erekshe oqıǵa jatsa kerek.
Shara uıymdastyrýshylary bul oqıǵalar adamdardyń janýarlarǵa degen aıaýshylyq sezimin oıatyp, tórt aıaqty dostaryna degen zábirdiń túbirimen joıylýyna septigin tıgize alady, dep esepteıdi.
«Biz bul kórmeni ekinshi jyl qatarynan uıymdastyryp otyrmyz. Byltyr kórmege alpysqa tarta adam qatyssa, bıyl aryz berýshilerdiń sany eki júz elýge jetti. Jyl saıyn bizdiń qatarymyzdyń ulǵaıyp otyratyny qýanyshty jaǵdaı, árıne. Biz adamdardyń óz «dostaryn» satyp alǵanyn emes, olardy janýarlar úıinen alǵanyn qalaımyz. Kórmedegi ár sýrette qutqarý oqıǵasy beınelengen. Qutqarýshy adam ǵana emes, janýar da bola alady. Mysaly, kúıeýi ómirden ozǵanda áıeldiń kúızelisten shyǵýyna kómektesken ıttiń sýreti tur osynda. Qazir olar - aıyrylmas dostar», - deıdi «Qaıyrymdylar klýbynyń» negizin qalaýshy Gúlmıra Ábdrasheva.
Turǵyndar bul jumystardy tegin tamashalaı alady, qaıyrymdylyqqa arnaıy aqshany bólý de mindetti emes. Al erikti túrde qol ushyn sozǵysy keletinderge kórme aýmaǵynda arnaıy jáshik ornatylǵan. Jınalǵan barlyq qarajat «Kovcheg» janýarlar úıi men qaladaǵy @zverohelp_astana janýarlardy qorǵaý jónindegi qozǵalystyń eriktileri arasynda bólinip, janýarlarǵa arnalǵan ekpelerge, zararsyzdandyrý sharalaryna, janýarlar azyǵyna jumsalatyn bolady.
Aıta keteıik, kórme «Keruen city» saýda ortalyǵynda (Qorǵaljyn tas joly, 1) 6 sáýirge deıin jumys istemek.
Janýarlardy qorǵaýǵa, olarǵa meıirimdilik tanytýǵa shaqyratyn mundaı kórmeler álemdik tájirıbede qoǵam tarapynan úlken qoldaý tabýda. Astana qalasynyń ákimdigi osy problemany kótere otyryp, úısiz janýarlardyń sanyn azaıtý maqsatynda birqatar sharalardy qolǵa alǵan. «Astana jastary» JRO-nyń dırektory Muhamedjan Bolysbektyń bergen málimetine súıensek, qazirgi tańda elordada 4 ga jerge baılanys zoobaǵy bar janýarlarǵa arnalǵan úıdi ornalastyrý jobasy ázirlenýde. Osy jobanyń júzege asýynyń nátıjesinde astanalyqtar zoobaqta serýendep júrip, ózine unaǵan janýardy asyrap ala alatyn bolady.
