Elordada «Memlekettik til jáne buqaralyq aqparat quraldary» atty respýblıkalyq konkýrs jeńimpazdary marapattalady
ASTANA. Maýsymnyń 24-i. QazAqparat - Maýsymnyń 25-i kúni QR Mádenıet mınıstrliginiń Til komıteti memlekettik til saıasatyn BAQ-tarda keńinen nasıhattaý jáne onyń qazaq jáne orys tildi basylymdarda nasıhattalý belsendiligin arttyrý maqsatynda
ári Baspasóz, teledıdar jáne radıo kúnine oraı «Memlekettik til jáne buqaralyq aqparat quraldary» atty respýblıkalyq konkýrsynyń jeńimpazdaryn marapattaıdy.
Atalǵan baıqaýǵa elimizdiń qoǵamdyq ómirinde memlekettik tildiń qyzmet etý aıasyn keńeıtý ári mártebesin nyǵaıtý, jarııalanymdar men habarlardyń sapasyn jaqsartý jáne qazirgi memlekettik tildiń ahýaly týraly ótkir de ózekti, synı materıaldar jarııalaǵan jekelegen tilshiler men shyǵarmashylyq toptar jáne BAQ-tar qatysqan bolatyn. Konkýrs «Úzdik basylym», «Úzdik telearna», «Úzdik radıo», «Úzdik saıt», «Úzdik avtor» atty atalymdar boıynsha ótkizildi.
Oǵan 2010 jylǵy qańtardyń 10-y men maýsymnyń 10-y aralyǵynda qazaq jáne orys tilderinde jaryq kórgen jarııalanymdar, efırden ótken habarlar qamtyldy.
Eń úzdik dep tanylǵan júldegerler arnaıy dıplommen jáne qarjylaı syılyqtarmen marapattalady.
