Elordada memlekettik satyp alýda qarajat jymqyrǵan kásipker sottaldy
NUR-SULTAN. QazAqparat - Elordada janar-jaǵar maı boıynsha memlekettik satyp alýda iri kólemde qarajat jymqyrǵan kásipker sottaldy, dep habarlaıdy QazAqparat Qarjy mınıstrliginiń Qarjy monıtorıngi komıtetine silteme jasap.
«Qarjy monıtorıngi komıtetiniń Nur-Sultan qalasy boıynsha Ekonomıkalyq tergeý departamenti 2017-2019 jyldar aralyǵynda memlekettik satyp alýda bıýdjet qarajatyn jymqyryp, memleketke asa iri kólemde zalal keltirgen kásipkerge qatysty qylmystyq isti aıaqtady. Atalǵan merzimde kásipkerdiń naqty basqarýymen 4 JK Qazaqstan aýmaǵynda ártúrli memlekettik kásiporyndar men mekemeler júrgizetin benzın men dızel otynyn (janar-jaǵar maı) jetkizýge baǵa usynystaryn suratý arqyly elektrondyq memlekettik satyp alýǵa qatysqan. Nátıjesinde árbir jaǵdaıda JK eń tómengi baǵany usynǵan jeńimpaz retinde tanylyp otyrǵan», - delingen habarlamada.
Osylaısha, kásipker 2017 jyldyń qyrkúıek aıynan 2018 jylǵy qazan aıyna deıingi aralyqta memlekettik satyp alý týraly sharttar boıynsha tapsyrys berýshilerden túsken aqsha qarajatyn jymqyryp, jeke maqsatta paıdalaný úshin qolma-qolǵa aınaldyrǵan.
«2020 jylǵy 9 sáýirde Nur-Sultan qalasy Saryarqa aýdanynyń №2 soty úkimimen aıyptalýshy 4 jylǵa memlekettik satyp alýmen baılanysty kásipkerlik qyzmetpen aınalysý quqyǵynan aıyrylyp, 6 jylǵa sottaldy. 2020 jyldyń 11 maýsymynda Nur Sultan qalasynyń apellıatsııalyq soty sottalýshyǵa qatysty úkimdi ózgerissiz qaldyrdy. Sot úkimi zańdy kúshine endi», - dep habarlady komıtet.
