Elordada memlekettik satyp alý salasynda 4 mlrd teńgeni quraıtyn zańbuzýshylyqtar anyqtaldy

ASTANA. QazAqparat - Esil aýdanynyń prokýratýrasy taldaý barysynda memlekettik satyp alý týraly zańnama talaptarynyń buzýshylyqtaryn anyqtady, dep habarlaıdy QR Bas prokýratýrasynyń baspasóz qyzmeti.

Elordalyq memlekettik mekemeler mindetti túrde tender ótkizbesten tańdalǵan ónim berýshilermen tikeleı memlekettik satyp alý týraly sharttardy zańsyz jasasýynyń 23 faktisi anyqtaldy.

Basqa jaǵdaıda, memlekettik mekemeler áleýetti qatysýshylardyń sanyn shektep, jumystardy lottarǵa bólmeı, olardyń birtekti túrleri boıynsha konkýrstyq qujattamanyń talaptaryn zańsyz túrde kúrdelendirip, nátıjesinde konkýrsqa kórsetiletin qyzmetterdiń naqty kólemin kórsetpeı, sondaı-aq qarjy jylynan asatyn merzimge shart jasasýǵa tyrysty.

Budan basqa, prokýratýra organdary tarapynan qadaǵalaý aktileriniń arqasynda memleket kirisine 26 mln teńge óndirilip, josyqsyz merdigerlerden aıyppul sanktsııalaryn óndirip alý boıynsha áreketsizdik faktileri anyqtaldy.

Engizilgen qadaǵalaý aktileriniń nátıjeleri boıynsha 3,9 mlrd teńgeden astam somaǵa zańsyz memlekettik satyp alý qorytyndylary joıyldy.

Kináli laýazymdy tulǵalar zańda belgilengen jaýapkershilikke tartylyp, barlyq memlekettik uıymdarǵa memlekettik satyp alý týraly zańnamany múltiksiz saqtaý qajettiligi týraly usynymdar berildi.