Elordada «Memlekettik qyzmettiń damýy jáne yntymaqtastyq» atty konferentsııa ótip jatyr

NUR-SULTAN. QazAqparat – Elordada Astana memlekettik qyzmet habynyń «Memlekettik qyzmettiń damýy jáne yntymaqtastyq» atty jyldyq konferentsııasy bastaldy, dep habarlaıdy QazAqparat tilshisi.

Halyqaralyq is-sharany ashqan Astana memlekettik qyzmet haby basqarýshy komıtetiniń tóraǵasy Álıhan Baımenov jańa ahýaldaǵy bir jarym jyl ishinde úkimetter birshama tájirıbe jınaqtaǵanyn, sonymen birge keıbir taǵylymdar týraly da aıtýǵa bolatynyn atap ótti.

«Birinshiden, daǵdarys jaǵdaıynda tez sheshim qabyldaý qajettiligi úkimetterdiń esep berýshiligi men ashyqtyǵyna tejeý bolmaý kerek. Ekinshiden, pandemııa jedeldetken memlekettik basqarýdy tsıfrlyq transformatsııalaý azamattardyń quqyqtary men bostandyqtaryna nuqsan keltirmeýi qajet. Úshinshiden, ınternet pen áleýmettik jelilerge qoljetimdilik halyqaralyq quqyqpen qorǵalyp, adamnyń ajyraǵysyz quqyqtary retinde tanylýy tıis. Munyń bári «jyldam jeńister» men strategııalyq maqsattar arasynda teńgerimniń bolý mańyzyn kórsetedi», - dedi ol.

Sonymen qatar, Astana memlekettik qyzmet haby basqarýshy komıtetiniń tóraǵasy osy turǵyda úzdiksiz bilim men tájirıbe almasýdyń mańyzy artyp kele jatqanyna basa nazar aýdartty.

Aıta keteıik, konferentsııa jumysyna álemniń 40-tan astam elinen memlekettik qyzmet ýákiletti organdary basshylary, sarapshylar, ǵalymdar, sondaı-aq halyqaralyq uıymdar ókilderi qatysyp jatyr.

Іs-shara 27-29 qazan aralyǵynda Nur-Sultan qalasynda offlaın jáne onlaın formatynda ótedi.