Elordada memlekettik qyzmetkerler spartakıadasy ótýde
ASTANA. 25 aqpan. QazAqparat - Astanada memlekettik mekeme qyzmetkerleriniń arasynda jyl saıyn ótetin Spartakıada bastaldy. Bul týraly Elordanyń resmı saıty habarlady.
Jarysqa Astana qalasynyń aýdan ákimdikteri, Departament pen Basqarma qyzmetkerleri sporttyń 8 túrinen qatysady. Atap aıtar bolsaq, shańǵy, shahmat, shaǵyn fýtbol, ústel tennısi, estafeta, arqan tartý jáne bılıard. Spartakıadanyń alǵashqy kúni shańǵy jarysynan bastaldy.
Atalǵan sharany ótkizýdiń basty maqsaty - buqaralyq sport túrlerin nasıhattap, memlekettik qyzmetkerler arasyndaǵy dostyq qarym-qatynasty nyǵaıtý. Jarystyń alǵashqy kúni 1-shi oryndy Kýchın, Şekotıhın, Tonıchenko, Barannık syndy memlekettik jáne kúshtik qurylym qyzmetkerleri ıelendi. Spartakıada 23 aqpannan 4 mamyrǵa deıin jalǵasyn tabady.
