Elordada memleket qarajaty esebinen úılerdi kúrdeli jóndeý jumystary qalaı júrgizilip jatyr
ASTANA. KAZINFORM – Elimizde biraz ýaqyttan beri tozyǵy jetken kópqabatty turǵyn úılerge memleket qarajaty esebinen kúrdeli jóndeý júmystaryn júrgizý baǵdarlamasy bar. Onyń ıgiligin elordalyqtar da kóre bastady.
Osyǵan oraı «Memleket esebinen kópqabatty úılerdi kúrdeli jóndeý» jobasynyń jetekshisi Gúlvıra Ábetovany sózge tartyp, atalǵan baǵytta atqarylyp jatqan jumystyń jaıyn bilgen edik.
- 2023-2024 jyldary menshik ıeleriniń kelisimimen pılottyq jobany iske asyrǵan edik. Onyń aıasynda qarjylandyrýdy biriktirip, protsedýrany jaqsarttyq. Qarajatty qaıtarý jınaq shoty arqyly júzege asyryldy. Baspana ıeleri úıleriniń shatyryn jóndep, jumsalǵan aqshany birtindep qaıtaryp jatyr. Eń aldymen, pılottyq joba aıasynda memlekettik baǵdarlamaǵa senim artty. Ekinshiden, menshik ıeler arasynda jobaǵa qatysty qarjylyq tártip jónge keldi. Memleket qarajatynyń saqtalýy men ýaqtyly qaıtarylýy qamtamasyz etildi. Bul nysannan jınalǵan qarajat kestege sáıkes tikeleı qaıtarylǵan birinshi jóndeý jumysy boldy. Lıft, shatyr, jylý pýnktterin aýystyrýdy kútip otyrǵan ózge de úılerge qarajatty jedel bólý óte mańyzdy. Sondyqtan jóndeý jumystaryn kútý merzimin tómendetý baǵytyndaǵy jumysty kúsheıtken jón. Óıtkeni, úıler tez tozady, - dedi Gúlvıra Ábetova.
Aıta keterligi, búginde elimizdiń zańnamasynda kópqabatty úılerdi kúrdeli jóndeý jumystaryn qarjylandyrýdyń mynadaı tetikteri qarastyrylǵan:
- maqsatty jınaq – bul páter ıeleri jınalysynda maquldanady jáne ortaq múliktiń quramyn aýystyrý nemese ishinara almastyrýmen baılanysty jyldyq smetaǵa kirmeıdi;
- jınaqtalǵan qarajatty paıdalaný – barlyq nysanda menshik ıeleri qarajat jınaý úshin shot ashýy tıis. Qajet bolǵan jaǵdaıda osy qarajat esebinen úıge jóndeý jumystary júrgiziledi. Ol úshin menshik ıeleleriniń jınalysy ótip, onda satyp alynatyn jadbyqtar men jóndeý jumysyn júrgizetin merdiger uıym betitiledi;
- memleket qarajaty. Jergilikti bıýdjet esebinen lıftini, ınjenerlik jelini, shatyrdy aýystyrýǵa paıyssyz zaım beriledi. Odan keıin jumsalǵan qarajat qaıtarylady. Memlekettik organ osy qaıtarylǵan qarajatty basqa úılerdi jóndeýge jumsaıdy.
Osy oraıda joba jetekshisi 2023-2029 jyldarǵa arnalǵan turǵy úı-kommýnaldyq sharýashylyqty damytý tujyrymdamasyn túzetý qajettigin aıtady. Óıtkeni, kópqabatty turǵyn úılerdi basqarý júıesine jańa sýbektiler engizilip jatyr. Alaıda, oryndalýy men baqylaýyna qatysty biryńǵaı ádis joq.
- Aldaǵy ýaqytty olardyń normatıvtik-quqyqtyq aktilerde kórinis tabaryna senim artamyz. Sol kezde biz oń nátıjelerimizdi memlekettik baǵdarlamanyń barlyq qatysýshysyna tarata alar edik, - dedi Gúlvıra Ábetova.
«Memleket esebinen kópqabatty úılerdi kúrdeli jóndeý» jobasynyń jetekshisi memleket qarajaty esebinen kópqabatty úılerdi jóndeý barysynda turǵyndar ádette nege shaǵymdanatyndyǵyna da toqtaldy. Onyń atap ótýinshe, búginde turǵyndardyń bári birdeı turǵyn úıdiń problemalary talqylanatyn jınalystarǵa qatysýǵa ýaqyt taba bermeıdi. al ýaqyt tapqandardyń ózi jınalys kóbine dalada ótetindikten ý-shýdyń saldarynan kóterilgen máseleni túsinbeı jatady.
- Qujattarmen tanysýǵa da múmkindikteri bola bermedi. Kópshiligi smetanyń ne ekenin túsinbeıdi, jóndeý jumystary men materıaldardyń túrlerin kórmeıdi. Munyń bári turǵyndar tarapynan saýaldar týyndatyp, protsedýralarǵa degen senimsizdigin týdyrady, - dedi ol.
Aıta keteıik, Astanada qoǵamdyq kólikke bir kúnde 1 mln astam adam mindi.