Elordada «Mektepke jol» aktsııasy aıasynda 7,5 myńnan astam balaǵa kómek kórsetildi
ASTANA. QazAqparat - «Mektepke jol» VII respýblıkalyq aktsııasy márege jetti. Jyl saıynǵy sharanyń maqsaty jetim, ata-anasynyń qamqorlyǵynsyz qalǵan balalarǵa, turmysy tómen jáne kóp balaly otbasylardan shyqqan balalarǵa qoldaý kórsetý, olarǵa qoǵamnyń qamqorlyǵyn sezinýge múmkindik berý boldy.
Aktsııa elordada 1 tamyzdan 30 qyrkúıekke deıin ótkizildi. Shara barysynda turmysy tómen jáne kóp balaly otbasylardan shyqqan 7 667 balaǵa kómek kórsetildi, dep habarlady, astana.gov.kz .
«Aktsııa aıasynda birneshe shara uıymdastyryldy. Atap aıtqanda, «Birinshi synyp oqýshylaryna syılyq» (muqtaj otbasylardaǵy birinshi synypqa barǵan balalarǵa syılyqtar tabystaý), «Meıirimdi qoldar» (iri saýda ortalyqtarynda ornatylǵan kıim-keshekterdi, mektepke qajetti zattardy qabyldaýǵa arnalǵan konteınerler), «Otbasy otbasyǵa kómektesedi: balany mektepke daıyndaımyz» aktsııalary men 16 jáne 23 tamyzda mektep jármeńkesi ótkizildi. Bıyl sharaǵa jergilikti atqarýshy organdar men úkimettik emes uıymdar, jeke kásipkerler, eriktiler men qala turǵyndary belsendi qatysty», - dedi Astana qalasy Bilim basqarmasy basshysynyń orynbasary Qasymhan Senǵazıev.
«Mektepke jol» aktsııasynyń bastalýy men barysy týraly aqparat Astana kóshelerinde 20-dan astam bılbord pen pılonda jarııalandy, sondaı-aq, №№ 13, 45 jáne 55a mektepterde ashylǵan qoǵamdyq qabyldaýlarda taratyldy», - dedi ol.
Q.Senǵazıevtiń aıtýynsha, aldymen qoldaýdy qajet etetin turmysy tómen jáne kóp balaly otbasylardan shyqqan balalardyń tizimi jasaldy. 1 qyrkúıek qarsańynda olardyń barlyǵy mektepke qajetti zattarmen, kıim-keshekpen jáne sport kıimimen qamtamasyz etildi. Sonymen qatar, demeýshilik kómektiń arqasynda jyly syrtqy kıim men aıaq kıimder taratyldy.
Balalardyń áleýmettik sebeptermen mektepke barmaı qalýynyń aldyn alý úshin jalpy 2 584 adamnan jumys toby quryldy. Oǵan pedagogtar, áleýmettik qyzmetkerler, polıtseıler men ata-analar endi. Top músheleri páterlerdi, jeke jáne saıajaı sektorlaryn aralady.
