Elordada mektepke deıingi mekemelerdiń tapshylyǵy tómendedi
ASTANA. QazAqparat - Elordada balabaqshalar sany artty, dep habarlaıdy qala ákimdiginiń saıty.
Astanada túrli tıptegi 262 mektepke deıingi mekeme jumys isteıdi, onda 48 154 bala tárbıelenedi. Sonyń ishinde, memlekettik balabaqshalar sany - 95, olarda 27 193 bala bilim alýda. Sonymen birge, vedomstvoǵa qarasty jáne jeke menshik balabaqshalar, shaǵyn ortalyqtar, mektepke daıyndyq synyptary bar.
Elordalyq Bilim basqarmasynyń málimetterine sáıkes, búgingi kúni Astanada 7 jasqa deıingi 169 070 bala tirkelgen. 1-6 jas aralyǵyndaǵy balalardy qamtý kórsetkishi - 47,5%, 3 - 6 jas aralyǵyndaǵy balalardy qamtý 70,6% quraıdy, mektep aldyndaǵy daıyndyqpen qamtý deńgeıi - 99,6%.
Sondaı-aq, qalada mamandandyrylǵan balabaqshalar, 3 sanatorıılik týberkýlezge qarsy balabaqsha bar. Arnaıy maqsattaǵy «Altyn besik» jáne «Asyl bóbek» balabaqshalarynda 290 bala bilim alýda.
Sonymen birge, elorda balabaqshalarynda korrektsııa kabınetteri, ınklıýzıvti bilim berý jáne arnaıy korrektsııalyq maqsattaǵy toptar bar. Atap aıtqanda, qalanyń 13 balabaqshasynda (№ 2, 11, 22, 30, 32, 33, 37, 38, 50, 54, 63, 65, 66) psıhologııalyq-pedagogıkalyq súıemeldeýi bar korrektsııa jáne ınklıýzıvti bilim kabınetteri jumys isteıdi. Qazirgi ýaqytta korrektsııa kabınetterine 210 bala baryp júr. Sondaı-aq, jyl saıyn arnaıy korrektsııalyq maqsattaǵy toptardyń sanyn kóbeıtý boıynsha jumys júrgizilýde.
Mektepke deıingi bilim berý nysandarynyń qurylysyna da erekshe nazar aýdarylyp otyr.
Bilim basqarmasy mamandarynyń pikirinshe, búgingi kúni elordanyń mektepke deıingi mekemelerindegi oryndardyń tapshylyǵy jańa balabaqshalardy paıdalanýǵa berýdiń arqasynda tómendep keledi. Mysaly, 2016 jyly 440 oryndyq 3 balabaqsha iske qosylyp, 5 balabaqshada 356,5 mln teńge qarjyǵa kúrdeli jóndeý júrgizildi.
Sonymen birge, elordada 116 jeke menshik balabaqsha bar, onyń 74-i tıptik ǵımarattarda 42-si beıimdelgen ǵımarattarda ornalasqan.
