Elordada mektepke deıingi mekemelerdiń 149 tárbıeshisi biliktiligin arttyrý kýrsynan ótti
NUR-SULTAN. QazAqparat - 2019 jyly jańartylǵan bilim berý baǵdarlamasy boıynsha qalanyń 149 tárbıeshisi biliktiligin arttyrý kýrsynan ótti, dep habarlaıdy qala ákimdiginiń resmı saıty.
Qalalyq bilim basqarmasy elordanyń barlyq pedagogtarynyń, sonyń ishinde memlekettik jáne jekemenshik balabaqshalardaǵy tárbıeshileriniń biliktiligin arttyrý kýrstaryn turaqty túrde ótkizedi. Máselen, jańartylǵan bilim berý baǵdarlamasy boıynsha 2019 jyly 149 tárbıeshi biliktilikti arttyrý kýrsynan ótti. 2016-2019 jyldar aralyǵynda «Órleý» BAUO AQ qysqa merzimdi kýrstarda mektepke deıingi bilim berýdiń 3398 pedagogy oqydy, onyń ishinde 135 dene shynyqtyrý muǵalimi, 2895 tárbıeshi, 140 ádisker, 26 mýzyka muǵalimi, 53 aǵylshyn tiliniń muǵalimi, 97 psıholog, 52 qazaq tiliniń muǵalimi. «Órleý» RIPKSO-da 71 meńgerýshi menedjment kýrsynan ótti.
Nazarbaev Ýnıversıtetimen yntymaqtastyq aıasynda 2018 jyly balabaqshalardyń 25 meńgerýshisi «Bilim berýdegi kóshbasshylyq» kýrstarymen qamtyldy. Sonymen qatar, elordada turaqty negizde ártúrli kásibı jumystar men konflıktologııa kýrstary ótkiziledi. Qala boıynsha mektepke deıingi uıymdarda beınebaqylaý kameralary belsendi engizilýde jáne jańartylýda.
Búgingi tańda balabaqshalarda 2465 beınebaqylaý kamerasy ornatylǵan, onyń 1050-i bıyl qosyldy. 2020 jyly taǵy 2000-nan astam kamerany ornatý jáne aýystyrý josparlanyp otyr. Bul ata-analardyń balasyn kɵrip, baqylap otyrýyna, qajet jaǵdaıda tıisti sheshim qabyldaýyna múmkindik beredi.
Aıta keteıik, elordalyq mektepke deıingi uıymdarda 3 092 tárbıelenýshi jumys jasaıdy.