Elordada mektep jármeńkesi ótip jatyr
Olar Nura aýdanynda tsırk janyndaǵy avtoturaqta, Baıqońyr aýdanynda «Aımaqtaý» saýda ortalyǵynyń avtoturaǵynda, Saryarqa aýdanynda Demalys Promenade alleıasynda, Esil aýdanynda Botanıkalyq park avtoturaǵynda jáne Almaty aýdanynda Abylaı han kóshesi 20A mekenjaıynda ornalasqan.
Joldasymen úsh bala tárbıelep otyrǵan elordalyq Janar ádettegideı bıyl da baǵanyń kóterilgenin aıtady.
«Jylda 1 qyrkúıekke qaraı bári qymbattaıdy. Ortasha eseppen alǵanda bir balanyń ózine kıim alýǵa 50-60 myń teńge jumsaımyn. Qazir ǵana 15 myń teńgege keńse taýarlaryn satyp aldym, biraq, bárin emes. Úsh balam bar. Otbasylyq bıýdjetke salmaq túspeý úshin 2 aıda bólip alamyn. Ótken aıda satyp ala bastadyq, qalǵanyn osy aıda alamyn», - dedi Janar.
Al satýshylar bıyl dápter men A4 qaǵazynyń baǵasy arzandaǵanyn aıtady.
«12 paraqty kádimgi dápter 20 teńge turady. 36 paraqty qalyń dápter quny – 160, al 48 bettigi – 180 teńge. Ótken jylmen salystyrǵanda birshama arzan. Qalamsap baǵasy 20 teńgeden, túrli-tústi qarandash 500 teńgeden 2 myń teńgege deıingi aralyqta. Oqýshylardyń sómkesi 6 myń teńgeden bastap qymbattaı beredi. Sýret salýǵa arnalǵan albom baǵasy 300 teńgeden bastalady. Penaldy 500 teńge men 2 myń teńge aralyǵynda satyp jatyrmyz. Satyp alýshy ótinse, baǵasyn azdap túsiremiz. Baǵa qoljetimdi. Ótken jyly qaǵaz, dápter baǵasy birshama joǵary bolatyn. Máselen, A4 qaǵazy ótken jyly 4-4,5 myń teńge bolsa, bıyl 2,5 myń teńgeden satyp jatyrmyz», - dedi Maıra Bolatqyzy.
Árıne, satýshylardaǵy mektep taýarlaryna baǵa ártúrli. Degenmen, Maıra Bolatqyzynyń baǵa tómendegeni jaıly aıtqanyn taǵy bir satýshy Maqpal da rastap otyr.
«Ótken jyly 12 bettik dápterdi 40 teńgeden satqan edik. Qazir 25 teńgeden saýdalap jatyrmyz. Qalǵan taýarlardyń baǵasynda aıyrmashylyq joq. Ata-analar balalaryna 15 myń teńgege keńse zattaryn satyp ala alady. Tipti keıbireýleri 15 myń teńgege sómkeni de, keńse taýarlaryn da satyp aldy», - dedi Maqpal.
Valentına jármeńkege nemerelerin kıindirý úshin kelipti. Ol ótken jyly nemerelerin jańa oqý jylyna daıyndaý úshin qansha qarajat jumsaǵanyn aıtyp berdi.
«Keńse taýarlary baǵasyn suramadym. Biraq, rıýkzak baǵasy qymbattaý eken. Biraq, 8 myń teńgeden satyp aldyq. Qatelespesem, ótken jyly úsh balany kıindirý úshin 500 myń teńge jumsaǵan edik. Mektep formasyn, basqa da zattar satyp aldyq. Ótken jylmen salystyrǵanda baǵa óskeni baıqalady», - dedi Valentına.
Elordanyń taǵy bir turǵyny Álııa balalarǵa mektep taýarlaryn arzanǵa satyp alý joldarymen bólisti.
«Ásirese kıim baǵasy qymbattaǵan. Tipti shalbardyń ózi 5 myń teńge turady. Jalpy bir balaǵa shamamen 70-80 myń teńge jumsaımyn. Ázirshe qarap júrmiz, satyp almadyq. Keıde Wildberries arqyly satyp alamyz. Ol jerde birshama arzan», - dedi Álııa.
Mektep formasyn satýshy Gúlnar bıyl baǵa tómendegenin aıtady.
«Mektep formasy 15 myń teńge turady. Bul somaǵa jıletka, shalbar, kostıým kiredi. Kóılek baǵasy 4-5 myń teńge shamasynda. Balalarǵa arnalǵan týflıdi 6 myń teńgeden, krassovkıdi 6 myń teńgeden bastap alýǵa bolady. Qyzdardyń shalbary 6,5 myń, kóılegi 5 myń teńge turady. ıÝbkany 4-5 myń teńgeden satyp jatyrmyz. Ótken jyly erlerge arnalǵan kostıýmder 17 myń teńge bolǵan. Bıyl baǵasy tústi. Qymbat emes dep oılaımyn. Bıyl 15 myń teńgeden saýdalaýdamyz», - dedi Gúlnar.
Aıta keteıik, mektep jármeńkesi 1 qyrkúıekke deıin ár senbi jáne jeksenbi kúnderi jumys isteıdi.
