Elordada mektep tapshylyǵy máselesi qalaı sheshilip jatyr
NUR-SULTAN. QazAqparat - Elorda basshylyǵy qaladaǵy áleýmettik problemalardyń biri – mektep jetispeýshiligin aqyryndap sheship keledi. Qazirgi ýaqytta Nur-Sultanda 130 oqý orny jumys isteıdi, onda 200 myńǵa jýyq oqýshy bar. Bul týraly «Habar 24» telearnasynda kórsetilgen «Bizdiń elordamyz» fılminde qozǵalyp ótti, dep habarlaıdy QazAqparat.
2019 jyly elimizdiń bas qalasynda úsh aýysymda oqıtyn segiz mektep bolatyn, al 2020 jyly olardyń sany eki ese azaıdy.
Oqý oryndarynyń shamadan tys jumys isteý problemasy aıtarlyqtaı azaıdy.
Memleket basshysynyń tapsyrmalaryn oryndaý aıasynda sońǵy eki jylda qalanyń túrli aýdanynda 12 myńnan astam oqýshyǵa arnalǵan 18 bilim nysany ashyldy.
Elordada 2021 jyly taǵy 15 mektep memlekettik bıýdjet qarajaty esebinen de, memlekettik-jekemenshik áriptestik jáne jeke ınvestıtsııalar kózinen de salynady.
Qabyldanyp jatqan sharalar elordadaǵy mektepterdiń jetispeýshilik problemasyn sheshýge múmkindik beredi.
«Elorda osyndaı kólemde ǵana salynady degen naqty jospar belgilengen joq. Qalamyz kún sanap ósip keledi, tıisinshe mektepter jetispeıdi. Aıta keterlik másele, tapshylyqty azaıtý qajet. Bul qıyndyqtyń aldyn alý úshin kóbirek mektep salynyp jatyr. Qazirgi Nur-Sultan endigi 20 jyldan keıin úlkeıip, áýejaıymyz Londondaǵydaı qala ortalyǵynda bolýy múmkin. Qalanyń ósip kele jatqanyn seziný kerek. Ákimdik atqaryp jatqan sharýalarǵa kóz salsaq, bári der kezinde júrgizilip jatqanyn baıqaýǵa bolady. Bıyl 16 mektep salynady, bul úlken jetistik dep sanaımyn», - dep atap ótti saıasattanýshy Samat Nurtaza.
Eske sala keteıik, jaqynda elordada birneshe áleýmettik nysan ashyldy. Olardyń arasynda kózi nashar kóretin balalarǵa arnalǵan mamandandyrylǵan balabaqsha da bar.
Balabaqshada tárbıeshilermen qatar medıtsına qyzmetkerleri de jumys isteıdi.
Bul balanyń fızıkalyq, psıhıkalyq damý erekshelikterin, jeke múmkindikteri men qabiletterin eskere otyryp, balany jan-jaqty damytýǵa, mektepke daıyndyǵyn qamtamasyz etedi. Mekemede fızıoterapııa, logoped-defektolog, oftalmolog jáne basqa kabınetter bar.
Osyǵan deıin elorda ákimi Altaı Kólginov qalada oqý oryndarynyń qurylysyna jiti kóńil bólinetinin atap ótken bolatyn.
«Mysaly Almaty aýdanynda 2400 oryndyq mektep salynyp, ashylýǵa daıyn (eki aýysymda; Maıqaıyń men A 351 kósheleriniń qıylysy). Oqý ornynda ınklıýzııa, «Abaıtaný», «STEM», «Intellektým» kabınetteri jáne beınesabaqtardy túsirýge arnalǵan stýdııa bar. Bul balalardyń jan-jaqty damýyna múmkindik beredi. Elordada aldaǵy 5 jylǵa 67 mekteptiń qurylysy josparlanyp otyr. Oqý oryndarynyń qurylysyna da jeke ınvestıtsııa tartylady», - dedi ákim.
