Elordada mektep oqýshylarynyń demalysy kezinde balalarǵa arnalǵan teatr aptalyǵy ótedi
5-15 jastaǵy balalarǵa laıyqtalǵan bul joba mektep oqýshylarynyń demalysy kúnderi ótedi, dep habarlaıdy QazAqparat «Astana Opera» teatrynyń baspasóz qyzmetine silteme jasap.
Baspasóz qyzmetiniń málimetterine qaraǵanda, baǵdarlama 23-28 naýryz aralyǵynda ótedi, onda ár jas teatrsúıer oqýshy ózine laıyqty kontsert nemese mýzykalyq ertegi taba alady. Sonymen, 23 naýryzda «Mýzyka álemi» kontserti ótse, kelesi kúni balalardyń nazaryna Sergeı Prokofevtiń «Petıa men Qasqyr» sımfonııalyq ertegisi usynylady. 25 naýryzda orkestr ártisteri Kamıl Sen-Sanstyń «Janýarlar karnavaly» zoologııalyq fantazııasyn oryndaıdy. Odan ári eki kún saıyn 27 jáne 28 naýryzda balalarǵa Tileýǵazy Beısembektiń «Samuryq kelgen tań» mýzykalyq ertegisi usynylady.
– «Balalarǵa arnalǵan klassıkalyq mýzyka aptalyǵy» festıvaliniń saltanatty ashylýy 23 naýryzda ótedi, onda júrgizýshilerdiń rólinde balalardyń ózderi bolyp, olar tájirıbeli ártister – «Astana Opera» teatrynyń juldyzdarymen bir sahnada alǵashqy kásibı qadamdaryn jasamaq. Festıval baǵdarlamasyna engen kontsertter men spektaklder qazaq jáne orys tilderinde ótedi. Bizdiń «balalar aptalyǵymyzǵa» kelgisi keletinder óte kóp. Teatrǵa balalaryn alyp keletin ata-analarǵa mýzykaǵa degen mahabbatty balalyq shaqtan bastap sińirý kerektigin túsingenderi úshin rızamyz. Festıval baǵdarlamasyna balalar teatry jumysyn bastaǵan sátten-aq qatty unatqan keremet kontsertter men spektaklder endi. Bizdiń festıval tanymal kompozıtor T.Beısembektiń «Samuryq kelgen tań» mýzykalyq ertegisiniń kórsetilimimen jabylady. Bul kóktem, Naýryz, jaqsylyq pen kún, baqyt pen bala kúlkisi jaıly hıkaıa. «Balalarǵa arnalǵan klassıkalyq mýzyka aptalyǵy» festıvali jyl saıyn ótkiziledi degen úmittemiz ári onyń baǵdarlamasyn jańa kontserttermen baıytýǵa daıynbyz, – dedi teatrdyń Ádebı-mýzykalyq jumys departamentiniń dırektory, mýzykatanýshy, Mádenıet qaıratkeri Marjan Jákenova.
