Elordada mektep oqýshylary úshin Hogwarts lageri uıymdastyryldy
ASTANA. KAZINFORM – Astana qalasy ákimdiginiń №101 orta mektebinde uıymdastyrylǵan jazǵy Hogwarts lageri aıasynda «Ulttyq tárbıe – urpaqtar murasy» atty taqyryptyq kún ótti, dep habarlady elorda ákimdiginiń resmı saıty.
Іs-shara aıasynda ulttyq qundylyqtardy dáripteý men zamanaýı aqparattyq tehnologııalardy ushtastyra otyryp, balalardyń shyǵarmashylyq jáne tanymdyq qabiletterin damytýǵa baǵyttalǵan birneshe sheberlik saǵaty men ınteraktıvti sabaqtar uıymdastyryldy. 6 jastan 13 jasqa deıingi 1-7 synyp oqýshylary qamtyldy.
Fızıka, ınformatıka jáne robototehnıka pánderiniń muǵalimi Aıtjan Ábilmajınov jetekshilik etetin baǵyttar – dron qurastyrý, VR qurylǵylarymen jumys jáne drondy sımýlıatorda basqarý. Ustazdyń aıtýynsha, bul baǵyttar balalardyń tek qyzyǵýshylyǵyn ǵana emes, tehnıkalyq oılaý men qaýipsizdik daǵdylaryn damytýǵa kómektesedi:
– VR qurylǵylary arqyly balalar shynaıy ómirde shekteýli áreketterdi vırtýaldy ortada erkin jasaı alady. Al drondarmen jumys barysynda olar onyń qurylymyn da meńgeredi. Qalaqshalar durys ornatylmasa, dron ushpaıdy – osynyń bárin tájirıbe júzinde túsindiremiz, - deıdi ol.
Qysh óneri boıynsha sheberlik sabaǵyn kórkem eńbek pániniń muǵalimi Erkebulan Maýıanov júrgizdi. Ol bul istiń tek sulýlyq emes, tártip pen muqııattylyqty qajet etetinin atap ótti:
– Sazben jumys balanyń usaq motorıkasyn damytyp qana qoımaı, onyń qııaly men ishki emotsııasyn erkin bildirýine múmkindik beredi. Bala materıaldy qolymen sezinip, oıyn kórkem túrde jetkizýge tyrysady, - deıdi ustaz.
Dene shynyqtyrý pániniń muǵalimi Baýyrjan Tomashev jetekshilik etken asyq atý, bes tas, toǵyzqumalaq sekildi ulttyq oıyndarǵa balalar zor qyzyǵýshylyq tanytty.
– Qalalyq ortada ósken balalardyń keıbiri bul oıyndarmen alǵash ret tanysyp jatyr. Degenmen qyzyǵýshylyqtary joǵary, - deıdi ustaz.
Hogwarts jazǵy lageri balalarǵa paıdaly bilim berip qana qoımaı, olardyń shyǵarmashylyǵyn, tehnıkalyq saýattylyǵyn jáne ulttyq qundylyqtarǵa degen qurmetin damytýda. Eki maýsymǵa josparlanǵan bul lagerge júzdegen bala qatysyp, ekinshi aýysymǵa qaıta kelip jatqan balalar sany jobanyń sátti júzege asyp jatqanyn kórsetedi.