Elordada mektep oqýshylary ózderi jasaǵan ınkýbatordan balapan shyǵardy

ASTANA. KAZINFORM – Astana qalasynyń jas zertteýshileri erekshe jetistikke jetti. «Adal Azamat» birtutas tárbıe baǵdarlamasynyń «Smart Bala» jobasy aıasynda №111 jalpy orta bilim beretin mekteptiń 8-synyp oqýshylary Perızat Keńesbek pen Aıjan Jasan, jetekshileri Altynaı Jolbasova men Aınur Koshkarovanyń qoldaýymen qoldan ınkýbator jasap, alǵashqy balapandardy dúnıege ákeldi, dep habarlaıdy elorda ákimdiginiń resmı saıty.

Inkýbatsııa qus sharýashylyǵynda mańyzdy protsess sanalady. Oqýshylar bul tájirıbege úlken jaýapkershilikpen qarap, bir aıǵa jýyq ýaqyt boıy barlyq talapty saqtaı otyryp, úzdiksiz baqylaý júrgizdi. Inkýbatordaǵy temperatýra men ylǵaldylyq kúndelikti tekserilip, jumyrtqalardyń damý kezeńderi muqııat jazylyp otyrdy.

2025 jyldyń 26 qańtarynan bastap joba naqty nátıjesin berip, alǵashqy balapandar jaryqqa shyqty. Bul oqıǵa jas zertteýshiler úshin mańyzdy ǵylymı jetistik sanalady. Ózderi jasaǵan qurylǵynyń jumys istep, tirshiliktiń paıda bolýyn kórý oqýshylarǵa tájirıbelik bilimniń mańyzdylyǵyn kórsetti. 

Joba barysynda oqýshylar:

– ınkýbatordyń qurylymy men jumys isteý prıntsıpin meńgerdi;

– temperatýra men ylǵaldylyqtyń mańyzyn tájirıbe júzinde baqylady;

– jumyrtqanyń damý kezeńderin zerttedi;

– teorııalyq bilimdi tájirıbemen ushtastyryp, naqty nátıjege qol jetkizdi;

– jaýapkershilik pen uqyptylyqqa úırendi;

– tabıǵat zańdylyqtaryn tereńirek túsindi;

– tájirıbelik baqylaý júrgizý daǵdylaryn damytty.

Bul joba oqýshylardyń ǵylymǵa qyzyǵýshylyǵyn arttyryp, teorııalyq bilimdi naqty ómirmen baılanystyrýǵa múmkindik beredi. Sonymen qatar eńbekke baýlý, zertteýshilik qabiletterdi damytý jáne jaýapkershilik sezimin qalyptastyrýda mańyzdy ról atqarady.

Eske sala keteıik, Astanada demalys kúnderi aýyl sharýashylyǵy jármeńkesi ótetinin jazǵanbyz.