Elordada mektep qurylysynyń qarqyny kúsheıtilmek
NUR-SULTAN. QazAqparat – Elorda ákimi Altaı Kólginov qaladaǵy úsh aýysymdy mektepterdi joıýǵa qatysty túsinik berdi, dep habarlaıdy QazAqparat.
«Jańa oqý jylynyń bastalýyna az ýaqyt qaldy. Áleýmettik az qamtylǵan otbasylardan shyqqan 17 myńǵa jýyq balaǵa materıaldyq kómek beriledi. Ár balaǵa 40 myń teńgeden bóldik. Sonymen qatar, qoǵamdyq kólikte balalar tegin júredi», - dedi A. Kólginov elorda máslıhatynyń kezekten tys sessııasynda.
Onyń aıtýynsha, kitap alýǵa 3 mlrd teńge qarajat bólindi. Oqý jylynda 1 mln jańa kitap taratylady.
«Qala aýmaǵynda mektepterdiń qurylysyn qarqyndy júrgizý máselesi Prezıdenttiń baqylaýynda tur. Úsh baǵyt boıynsha, ıaǵnı memlekettik bıýdjet esebinen mektep salýdy, memlekettik-jekeshelik áriptestik jáne jeke ınvesıtıtsııalar esebinen iske asyramyz. Aldaǵy ýaqytta mektep qurylysynyń qarqynyn kúsheıtýimiz kerek. Bas josparda ár shaǵyn aýdanda, jańa qurylys nysandary salynyp jatqan jerlerde salynatyn mektepterdi bekittik», - dedi ákim.
«Bul baǵyttaǵy jumystar qosymsha oryndardy qamtamasyz etýge, úsh aýysymdaǵy mektepterdiń sanyn azaıtýǵa múmkindik beredi. Qurylys tıisti deńgeıde júrgizilmese, mektepterge túsetin júkteme arta túsedi», - dedi A. Kólginov.
Budan buryn habarlanǵandaı, bıyl elordada 11 mekteptiń qurylysy aıaqtalady.
Qalada úsh aýysymmen isteıtin 4, al bala sany shamadan tys kóp 15 mektep bar .
Altaı Kólginov qaladaǵy JEO-3 qurylysy boıynsha merdigerge qatań talaptar qoıylǵanyn aıtty.
