Elordada mektep dırektory pyshaq jaraqatymen aýrýhanaǵa tústi
ASTANA. QazAqparat – Pyshaq jaraqatyn alǵan astanalyq mektep dırektory aýrýhanada jatyr, dep habarlaıdy QazAqparat tilshisi.
Astana qalalyq Densaýlyq saqtaý basqarmasy patsıenttiń qazirgi jaǵdaıy týraly málimet berdi.
«26 aqpanda jedel járdem brıgadasy patsıentti №2 qalalyq kópbeıindi aýrýhanasyna jetkizdi. Jaǵdaıynyń aýyrlyǵyn eskere otyryp, patsıent shuǵyl túrde emdeý úshin keýde hırýrgııasy bólimine jatqyzyldy. Sol kúni oǵan operatsııa jasaldy. Qazirgi ýaqytta naýqastyń jaǵdaıy qanaǵattanarlyq, operatsııadan keıingi kezeńge sáıkes keledi», - delingen resmı habarlamada.
Basqarmanyń aqparatynsha, naýqas dıagnostıka jáne emdeý hattamasyna sáıkes tolyq kólemde em alyp jatyr.
Sondaı-aq, qalalyq Bilim basqarmasynyń baspasóz qyzmeti bul naýqastyń mektep dırektory ekenin rastap otyr.
«Iá, áıeldiń mektep dırektory ekenin rastaımyz. Ol 20 aqpannan bastap eńbek demalysynda bolǵan», - dedi basqarmanyń baspasóz qyzmetinen.
Buǵan deıin Astanada páterlerdiń birinen er adamnyń máıiti tabylyp, pyshaqtalǵan áıeldiń aýrýhanaǵa jetkizilgeni týraly habarlaǵan edik.
«Astana qalasy Polıtsııa departamentiniń «102» arnasyna 26 aqpan kúni páterden er adamnyń máıiti tabylǵany jáne pyshaq jaraqatyn alǵan áıeldiń aýrýhanaǵa jetkizilgeni týraly habar kelip tústi», - degen aqparat aldyq Polıtsııa departamentinen.
Departamet aqparatyna sáıkes, atalǵan fakti boıynsha sotqa deıingi tergeý bastaldy. Sonymen qatar, qajetti saraptamalar taǵaıyndaldy.
