Elordada mekemelerdiń jumysy toqtaǵany týraly jalǵan aqparat taratqandar izdestirilýde
NUR-SULTAN. QazAqparat – Elorda ákimi Altaı Kólginov boranǵa baılanysty qaladaǵy mekemeler men uıymdardyń jumysy toqtatylǵany týraly jalǵan aqparat taratqandardy polıtsııa izdestirip jatqanyn aıtty, dep habarlaıdy QazAqparat tilshisi.
«Jelide shyndyqqa janaspaıtyn aqparat taraǵan. Osy oraıda resmı aqparatqa qaraý kerektigin aıtqym keledi. Boranǵa baılanysty tórt kún boıy jumys bolmaıtyndyǵy týraly aqparat shyndyqqa saı emes. Qazir endi polıtsııa jalǵan aqparat qaıdan taraǵanyn qarap, jaýapqa tartýy kerek», - dedi Altaı Kólginov qalalyq TJ departamentinde ótken otyrysta.
Osy oraıda ákim turǵyndar arasynda negizsiz dúrbeleń týdyrýǵa jol berilmeıtinin aıtty.
«Sondyqtan qala qyzmetteri ózderine júktelgen jumystardy atqarýy tıis. Qosymsha tehnıkany jumyldyramyz, sáıkesinshe, alǵan qoıylǵan maqsatty oryndaımyz», - dedi Altaı Kólginov.
Budan buryn habarlanǵandaı, Nur-Sultan qalasynyń ákimi Altaı Kólginov qaladaǵy memlekettik mekemelerdiń báriniń jumysyn toqtatqany týraly aqparatty joqqa shyǵardy.
«Aýa raıynyń qolaısyzdyǵyna baılanysty qaladaǵy barlyq mekemelerdiń jumysyn toqtatýǵa qatysty aqparat shyndyqqa janaspaıdy», - dep jazdy ákim Instagram paraqshasynda.
Taratylǵan jalǵan aqparatta boranǵa baılanysty aldaǵy birneshe kún boıyn mekemelerdegi, uıymdardaǵy jumystar toqtatylatyny aıtylǵan.
