Elordada medqyzmetkerlerge tegin qoıylym uıymdastyryldy
NUR-SULTAN. QazAqparat – Elorda keshe, 28 qańtarda COVID-19 indetimen kúrestiń aldyńǵy shebinde júrgen aq halatty abzal jandarǵa arnalǵan M.Áýezovtiń «Abaı–Toǵjan» mýzykalyq dramasynyń qoıylymy ótti. Mundaı ıgi sharany Nur-Sultan qalasy ákimdiginiń «Mýzykalyq jas kórermen teatry» uıymdastyrdy, dep habarlaıdy QazAqparat.
Dúnıejúzi áli kúnge deıin koronavırýs indetiniń buǵaýynan bosatylmaı keledi. Bul qarýsyz kúreste qoǵam arasynda dárigerler men meıirbıkelerdiń batyl eńbekteri erekshe baǵalanýda. Ásirese, olardyń tabandy erligine aýrýhana qabyrǵasynda jatqan naýqastar kýá. Aq halattylar óz ómirlerin táýekelge salyp, qarapaıym halyqtyń ǵumyryn saqtap qalýǵa bar kúshin salyp jatyr. Sondyqtan, teatr ujymy mundaı erlikti este saqtaı otyra, kezekti qoıylymdy medıtsına qyzmetkerlerine arnady.
Shara barysynda teatr dırektorynyń orynbasary Almas Shoman altyn ýaqyttaryn arnap, mýzykalyq qoıylymǵa kelgen medıtsına qyzmetkerlerine barlyq ujym atynan alǵysyn bildirdi.
- M. Áýezovtiń «Abaı–Toǵjan» mýzykalyq dramasy búgin medıtsına salasynyń qyzmetkerlerine arnaıy sahnalandy. Qazirgi pandemııa jaǵdaıynda aýyr indetpen kúresip jatqan dárigerlerdiń eńbegi orasan zor ekeni bárimizge málim. Bizdiń ártisterimizdiń sizderge arnalǵan qoshemeti men qurmetin qabyl alyńyzdar, - dedi Almas Shoman.
Qoıylymdy jalpy 50-ge jýyq medıtsına qyzmetkerleri tamashalaı aldy. Atap aıtsaq, Nur-Sultan qalasynyń №4, №7, №9 qalalyq emhanalardan jáne Ulttyq neırohırýrgııa ortalyǵy men Ulttyq ǵylymı kardıohırýrgııa ortalyǵynan keldi.
- Búgingi qoıylymdaǵy akterlerdiń sheberligi men barlyq mýzykalyq aspaptardyń jandy dybystary janymyzdy jadyratpaı qoımady. Biz qýanyshtymyz. Teatr ujymy bizge osyndaı keremet kóńil-kúı syılady, shattana otyryp tamashaladyq. Sol úshin alǵysymdy bildiremin. Koronavırýstyń emi tabylyp, tezirek búkil álem pandemııanyń qursaǵynan shyqsa eken deımin. Elimiz aman bolsyn! - dedi №4 qalalyq emhananyń dárigeri Araılym Seıdanova.
- Teatr ujymynyń arnaıy shaqyrýymen búgingi «Abaı–Toǵjan» qoıylymyn tamashalap shyqtym. Qoıylym óte joǵary deńgeıde ótti. Bizderge, myna álemdi jaýlaǵan pandemııamen kúresip jatqan aq halatty abzal jandardyń eńbekterin erekshe baǵalap, qurmetpen qaraǵan teatr ujymyna alǵysymdy bildiremin, - dep №9 qalalyq emhananyń meıirbıkesi Nazerke Berdalıeva óz pikirimen bólisti.
«Abaı–Toǵjan» mýzykalyq dramasy – qazaqtyń uly aqyny Abaı Qunanbaıulynyń bozbala kezeńinen kórinis berip, alǵashqy mahabbatyn shynaıy sıpattaıtyn sahnalyq týyndy. Qoıylymdy tamashalaýshylar XIX ǵasyrǵa aıaq basyp, Abaıdaı adamzat tarıhyndaǵy birtýar tulǵanyń álemine saıahat jasaıdy. Sondaı-aq, sol kezdegi jastardyń jarqyn turmys-tirshiligimen, salt-dástúrimen, ózara qarym-qatynastarymen jaqyn tanysady. Osyndaı qubylystar Abaı men Toǵjannyń mahabbatynyń týyndaýyna sebep bolady. Jas Abaı taǵdyrdyń jazýymen Toǵjandaı sulýdy kezdestirip, ómirinde alǵash ret mahabbattyń balǵyn dámin sezinedi.
Spektakldiń ınstsenırovka avtory - Mıras Ábil, rejısseri - Qazaqstannyń eńbek sińirgen qaıratkeri Ashat Maemırov, qoıýshy-rejısseri - Alma Syrbaeva, kompozıtory - Baýyrjan Aqtaev, baletmeısteri - Shyryn Mustafına, hormeısteri - Ǵalymjan Berekeshev.
Basty rólderde: «Daryn» memlekettik jastar syılyǵynyń laýreaty Aıan Ótepbergen (jas Abaı), Arelana Amangeldıeva (Toǵjan), 71-shi Kann halyqaralyq kınofestıvaliniń jeńimpazy, Qazaqstannyń eńbek sińirgen qaıratkeri Samal Eslıamova (Uljan), Altynbek Amanqulov (Qunanbaı), «Daryn» memlekettik jastar syılyǵynyń laýreaty Asylhan Tólepov (Ospan), Armat Amandyqov (Erbol), Sultan Keńshilik (Aqqozy), Tańsholpan Nurtileýqyzy (Kerimbala), Orazaly Igilik (Jyraý), Sábıra Súgirova (Jazmysh).
