Elordada medıtsınalyq buıymdardy tehnıkalyq saraptamadan ótkizetin zerthana salynady

ASTANA. KAZINFORM — Elordada medıtsınalyq buıymdardy halyqaralyq standartqa saı tehnıkalyq saraptamadan ótkizetin zerthana salynady. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— Memleket basshysy 2029 jyly ishki naryqtaǵy Qazaqstan óndiretin dári-dármek úlesin 50 paıyzǵa deıin jetkizý mindetin júktedi. Úkimet dárilik zattar men medıtsınalyq buıymdar aınalymy salasyn normatıvtik retteýdi jetildirý boıynsha jumys júrgizdi. Dárilik zattar men medıtsınalyq buıymdardy memlekettik tirkeý merzimi qysqartylyp, ákimshilik protsedýralardyń birizdiligin ońtaılandyrýǵa múmkindik beretin úılesimdi qyzmet engizdi, — dedi Úkimet basshysy.

Onyń atap ótýinshe, Eýrazııalyq ekonomıkalyq odaq aıasynda tirkeý protsesin jedeldetý úshin Qazaqstan taýar óndirýshilerine sarapshylyq jumys quny 90 paıyzǵa deıin tómendetildi. Bul dárilik zattardy tirkeýdiń 60 paıyzǵa artýyna jol ashty. 

— Sonymen qatar búginde Astana qalasynda medıtsınalyq buıymdardy halyqaralyq standartqa saı tehnıkalyq synaqtan ótkizetin zerthananyń qurylysy júrgizilip jatyr, — dedi Oljas Bektenov.

Premer-mınıstrdi jaýabyna qosa berilgen anyqtamaǵa sáıkes, Densaýlyq saqtaý mınıstrliginiń «Ulttyq dárilik zattar men medıtsınalyq buıymdardy saraptaý ortalyǵy» memlekettik kásiporny zerthanasyn salýǵa 10 gektar jer bólingen. Bıyl jobalyq qujattamasyn ázirleý úshin qarjylandyrý kózdelip otyr. 

Esterińizge sala ketsek, senator Janna Asanova elimizde sýbstantsııa óndirisi múldes joqtyǵyna baılanysty Premer-mınıstr Oljas Bektenovtiń atyna depýtattyq saýal joldaǵan edi.