Elordada medıtsına salasynda jasandy ıntellekt qalaı qoldanylyp júr

ASTANA. KAZINFORM – Elordada azamattarǵa medıtsınalyq qyzmetterdi qashyqtan kórsetý jáne olardyń densaýlyǵyn baqylaý maqsatynda jasandy ıntellektti (JI) qoldanatyn otandyq tsıfrlyq sheshimder engizilip jatyr, dep habarlaıdy elorda ákimdiginiń resmı saıty.

Bul týraly densaýlyq saqtaý júıesin tsıfrlandyrý máseleleri boıynsha ótken jumys keńesinde Astana qalasynyń Qoǵamdyq densaýlyq saqtaý basqarmasynyń basshysy Álııa Rústemova málimdedi. 

Basqarma basshysynyń aıtýynsha, elordalyq densaýlyq saqtaý júıesinde jasandy ıntellekttiń kómegimen:

• glaýkoma, kóz melanomasy, gıpertonııa jáne jasqa baılanysty makýlıarlyq degeneratsııa sııaqty aýrýlardy qashyqtan dıagnostıkalaý qyzmetteri kórsetiledi;

• qant dıabeti, sozylmaly júrek jetkiliksizdigi jáne gıpertonııa sııaqty áleýmettik mańyzy bar úsh aýrý boıynsha naýqastardyń negizgi densaýlyq kórsetkishteri qadaǵalanady;

• kóz aýrýlaryn dıagnostaıtyn jasandy ıntellektke negizdelgen baǵdarlamalyq jasaqtama qoldanylady;

• telemedıtsınalyq keshendi qamtıtyn naýqastardyń densaýlyǵyn monıtorıngileý jáne dıagnostıkalaý júzege asyrylady.

Sonymen qatar «Astana Smart City Accelerator» akseleratsııalyq baǵdarlamasy aıasynda 5 pılottyq joba iske asyrylǵan. 

– Búgingi tańda elordalyq densaýlyq saqtaý salasynda jasandy ıntellekt negizinde birneshe sheshim engizildi. Solardyń biri – radıologııalyq zertteýlerdiń tsıfrlyq muraǵaty PACS (VIDISOFT) júıesi. Bul júıede 4 mıllıonnan astam zertteý ıntegratsııalanǵan, nátıjesinde dıagnoz qoıý merzimi 30 kúnnen 3 kúnge deıin qysqaryp, keskinderdi taný dáldiginiń artýy esebinen medıtsınalyq kómektiń sapasy jaqsardy. Onkologııalyq aýrýlarmen kúres aıasynda jasandy ıntellektti paıdalana otyryp, radıologııalyq zertteýlerdi ortalyqtandyrý boıynsha jumys júrgizip jatyrmyz, - dedi Álııa Rústemova.

Eske sala ketsek, Memleket basshysy Joldaýynda jasandy ıntellekt el damýynyń negizgi faktory ekenin atap ótti. Óz kezeginde Prezıdent ekonomıka men memlekettik basqarýdan bastap, bilim berý jáne ǵylym salalaryna deıin barlyq baǵytqa engizilýi tıis ekenin aıtty. 

Buǵan deıin statsıonarlardyń medıtsınalyq qyzmetterge arnalǵan tarıfteri qaıta qaralatynyn habarlaǵan edik.