Elordada medıtsınalyq maskalardy qymbatqa satqandar tergelýde
NUR-SULTAN. QazAqparat - Nur-Sultan qalasynda medıtsınalyq maskalardy qymbat baǵaǵa satqan bir top azamat anyqtaldy, dep habarlaıdy QazAqparat QR Qarjy mınıstrligi Qarjy monıtorıngi komıtetiniń baspasóz qyzmetine silteme jasap.
«2020 jylǵy 18 naýryzda QR QM Qarjy monıtorıngi komıtetiniń Nur-Sultan qalasy boıynsha Ekonomıkalyq tergeý departamenti Pavlodar oblysy boıynsha Ekonomıkalyq tergeý departamentimen birlese otyryp zańsyz kásipkerlik qyzmet faktisin anyqtady. Respýblıkadaǵy tótenshe jaǵdaıǵa oraı elordalyq bir top azamat halyqqa qymbat baǵada 55 myń dana medıtsınalyq maskany satýmen aınalysqan. Sondaı-aq, olardyń bul maskalarǵa beriletin arnaıy qujattary bolmaǵan. Maskany satýdan túsken paıdanyń jalpy somasy 12 mln 500 myń teńgeni qurady. Qazirgi ýaqytta sotqa deıingi tergeý amaldary bastaldy», - delingen málimette.
Qazaqstandyqtar betperdelerdi qymbat baǵaǵa satý faktileri týraly senim telefondaryna habarlaı alady.
«Eger medıtsınalyq maska men antıseptıka quraldarynyń baǵasyn negizsiz kóterý faktileriniń kýási bolsańyzdar, kelesi senim telefondary boıynsha: QR QM Qarjy monıtorıngi komıteti – 8 (7172) 70-84-78, Nur-Sultan qalasy boıynsha ETD – 8 (7172) 31-61-45 habarlasýdy suraımyz», - dedi vedomstvodan.
