Elordada medıtsınalyq anyqtamanyń shynaıylyǵyn ınternet arqyly tekserýge bolady
ASTANA. 11 shilde. QazAqparat - Medıtsınalyq anyqtamany qoldan jasaý faktileri jyldan-jylǵa artyp keledi.
Osyǵan baılanysty Astana qalalyq densaýlyq saqtaý basqarmasy atalǵan zańsyz áreketterge jol bermeý maqsatynda Іshki ister departamenti, Jumyspen qamtý jáne áleýmettik baǵdarlamalar basqarmasy, QR Densaýlyq saqtaý mınıstrligi Medıtsınalyq jáne farmatsevtıkalyq qyzmetti baqylaý komıtetiniń Astana qalasy boıynsha departamenti tórtjaqty kelisimge qol qoıyp, jalǵan anyqtamalardy boldyrmaý úshin birikken is-sharalar josparyn ázirledi. Bul týraly astana.kz saıtyna Densaýlyq saqtaý basqarmasynyń baspasóz qyzmetinen málim etti.
Bul is-shara aıasynda berilgen árbir anyqtamanyń qaýipsizdigin saqtaý qarastyrylǵan.
Barlyq medıtsınalyq mekemelerde 086.kz resmı saıty ashyldy. Onda barlyq zańdy qoldanystaǵy anyqtamalar týraly aqparattar ornalastyrylǵan.
"Endi árbir jumys berýshi saıtqa kirý arqyly anyqtamanyń jalǵan emestigin teksere alady. 086.kz saıtyna kirý kezinde tıisti azamattyń JSN-in terý arqyly jumys berýshi berilgen medıtsınalyq anyqtamany tekserýge quqy bar" - dep habarlaıdy vedomstvo.
Kórsetilgen aqparat jumys berýshige óz tarapynan anyqtamanyń jalǵan emestigine kóz jetkizý úshin, al quqyq qorǵaý organdaryna baqylaý jasaýǵa kómektesedi. Budan bólek, Densaýlyq saqtaý basqarmasy medıtsınalyq anyqtamanyń bútindeı qaýipsizdigin qorǵaıtyn jáne jalǵan anyqtama jasaýǵa jol bermeıtin formasyn ázirledi. Árbir medıtsınalyq mekemelerde quqyq qorǵaý organdarymen birge qadaǵalaıtyn jaýapty tulǵa bekitildi. Jalǵan anyqtama berilgeni anyqtalatyn bolsa, qatań jazalaý kózdelýde.
