Elordada medıtsına uıymdaryna 166 mlrd teńge aýdaryldy

NUR-SULTAN. QazAqparat – Elordada 2020 jyly Kepildendirilgen tegin medıtsınalyq kómek pen Mindetti áleýmettik-medıtsınalyq saqtandyrýǵa 2019 jylǵa qaraǵanda qarajat 55 paıyzǵa artyq aýdarylǵan. Bul týraly Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov málim etti, dep habarlaıdy QazAqparat tilshisi.

«Mindetti áleýmettik-medıtsınalyq saqtandyrý aıasynda qalanyń medıtsınalyq uıymdary osy jyldyń qańtary men qyrkúıegi aralyǵynda aldyn ala tekserý, konsýltatıvti-dıagnostıkalyq kómek, statsıonarólsheýshi kómek, statsıonarlyq-medıtsınalyq kómek, sonymen qatar joǵarytehnologııaly medıtsınalyq, qalpyna keltirý em-domy men medıtsınalyq ońaltý qyzmetter kórsetildi. 2020 jyldyń 1 qańtarynan bastap KT men MRT qatarly teskerýdiń qymbat túrleri, medıtsınalyq-genetıkalyq zertteýler, qymbat turatyn zerthanalyq qyzmetter anyqtamasy men medıtsınalyq-sanıtarlyq dárigerdiń baǵyttamasy boıynsha kelgen patsıentterge tegin kórsetilýde», - dedi Tımýr Muratov qala ákimdiginiń Facebook paraqshasynda ótken baspasóz máslıhatynda.

Onyń aıtýynsha, medıtsınalyq qyzmetterdiń tasymaldaýshysy reestrine kiretin medıtsınalyq uıymdarda (onyń ishinde respýblıkalyq jáne jekemenshik) KT-nyń 19 apparaty jáne MRT-nyń 19 apparaty bar. Bıyl sonymen birge qaladaǵy №9 jáne №13 emhanalarǵa qosymsha 2 apparat satyp alynǵan.

Odan bólek, basqarma basshysy 2020 jyldyń 1 qańtaryndaǵy jaǵdaı boıynsha qaladaǵy emhanalarǵa 1 191 650 adamnyń tirkelgenin málim etti.

Tımýr Muratovtyń aıtýynsha, 2020 jyly Kepildendirilgen tegin medıtsınalyq kómek pen Mindetti áleýmettik-medıtsınalyq saqtandyrý aıasynda medıtsınalyq uıymdarǵa 166 mlrd teńge bólingen. Bul – 2019 jylǵa qaraǵanda 55 paıyzǵa kóp soma.