Elordada medıtsına mamandaryna arnalǵan jataqhana salynady
ASTANA. QazAqparat – Búginde 1,3 mıllıonnan astam astanalyq alǵashqy medıtsınalyq-sanıtarlyq kómek kórsetetin uıymdarǵa tirkelgen. Sondaı-aq qalada 2 153 tósek-orynmen qamtylǵan 7 respýblıkalyq jáne vedomstvolyq aýrýhana bar, dep habarlaıdy QazAqparat tilshisi Astana qalalyq qoǵamdyq densaýlyq basqarmasyna silteme jasap.
«2020 jyly jergilikti bıýdjetten 243 grant bólinip, ótken jyly 151 jas maman, al bıyl 92 maman oqýyn aıaqtady. 2022-2023 jyldarǵa 19 medıtsınalyq mamandyqtar boıynsha 128 orynǵa grant bólindi. Bul úrdis jalǵasyn tabady, osy oraıda bizdiń basqarma 2023-2026 jyldarǵa 131 grant bólý týraly ótinim berdi. Odan bólek, mamandardy turǵyn úımen qamtý máselesi mańyzdy. Bul oraıda qala ákimdigi jumys isteıtin jastar úshin satyp alý quqyǵynsyz jalǵa beriletin turǵyn úı jáne turǵyn úıge muqtaj jan retinde jergilikti atqarýshy organdarda esepte turǵan azamattar úshin «Shańyraq» baǵdarlamasyn iske qosty. Sonymen qatar, elorda jastaryn turǵyn úımen qamtamasyz etýdiń qosymsha quraly retinde «Elorda jastary» jeńildetilgen nesıe berý baǵdarlamasy bekitildi», - delingen Densaýlyq saqtaý basqarmasynyń habarlamasynda.
Sondaı-aq, basqarmadan medıtsına kadrlaryn yntalandyrý maqsatynda arnaıy jataqhana salynatyny aıtyldy.
«Bilikti kadrlardy tartý maqsatynda ákimdik medıtsına qyzmetshilerine arnalǵan 1 jataqhana salý boıynsha jumys júrýde. Ol Almaty aýdanynda Astana-Qaraǵandy tas jolynyń boıynda salynbaq. Sonymen qatar medıtsına qyzmetkerleri úshin qosymsha áleýmettik qoldaý sharalary qarastyrylyp jatyr. Mysaly: turǵyn úıdi jalǵa alýdyń ishinara tólemi jáne 2 bazalyq laýazymdyq jalaqy mólsherinde bonýstyq tólem jáne tegin júretin qoǵamdyq kólik kólik kartalaryn berý», - deıdi vedomstvodan.
Aqparatta aıtylǵandaı, qazirgi ýaqytta elorda turǵyndary tolyqtaı elektrondyq densaýlyq pasportyna kóshken.
«Búginde ár turǵynǵa elektrondyq densaýlyq pasporty jasaldy. Medıtsınalyq aqparattyq júıe arqyly 3 mln-ǵa jýyq ótinishke qyzmet kórsetildi. Tsıfrlandyrý protsesteri emhanalardaǵy kezekti 2 ese qysqartýǵa, dárigerlerdi qaǵazbastylyqtan bosatýǵa jáne patsıentterge kóbirek ýaqyt bólýge múmkindik berdi. Sondaı-aq, birqatar qyzmetti onlaın alýǵa múmkindik beretin mobıldi qosymsha ázirlendi. Mysaly, dárigerge aldyn ala jazylý, dárigerdi úıge shaqyrý jáne taǵy sol sııaqty. Odan bólek, bıyl 6 aıda sırek kezdesetin dertke shalddyqqan 270 naýqas dári-dármek jáne medıtsınalyq buıymdarmen qamtamasyz etildi», - delingen basqarmanyń málimdemesinde.
Elordanyń densaýlyq saqtaý basqarmasynyń habarlaýynsha, medıtsınalyq uıymdardy jabdyqtaý jáne qaıta jaraqtarý baǵytynda birqatar is atqaryldy.
2020-2022 jyldary atalǵan maqsatqa 17,4 mlrd teńge bólingen. Onyń ishinde 23 mln teńgesi respýblıkalyq bıýdjetten qarastyrylǵan.
