Elordada medıtsına buıymdarynyń zańsyz saýdasyn anyqtaý maqsatynda reıd júrgizildi

NUR-SULTAN. QazAqparat – Elordada polıtseıler volonterlermen birge reıd júrgizip, medıtsınalyq zattardyń zańsyz satylý faktilerin anyqtady. Quqyq buzýshylardan 188 medıtsınalyq betperde jáne 112 antıseptık tárkilendi, dep habarlaıdy qala ákimdiginiń resmı saıty.

Elordalyq Polıtsııa departamentiniń qyzmetkerleri tótenshe jaǵdaı men karantın talaptarynyń oryndalýy boıynsha shaǵyn jáne orta bıznes qyzmetine tekserý júrgizdi. Qazirgi ýaqytta polıtsııa qyzmetkerlerine 235 erikti kómek kórsetedi, olar baqylaý beketterindegi, reıd kezindegi jumystarǵa tartylǵan.

«Elordada karantın rejımi jarııalanǵanda volonterler polıtseılerge kómekke keldi. Olardyń árqaısysy azamattyq ustanymyn kórsetip, bizben birge jumys isteýdi óziniń mindeti dep sanaıdy. Biz olardyń usynystaryn qýana qabyldadyq. Biz birlesip, koronavırýstyń taralýyna qarsy tura alamyz. Bolashaqta eriktilermen birlesken jumys tájirıbesin qoldana alamyz dep úmittenemiz», - dedi elordanyń bas polıtseıi Erjan Sádenov.

Tekseris barysynda eldegi tótenshe jaǵdaıǵa qaramastan, qaladaǵy birqatar uıymdardyń shtattyq rejımde jumys istegeni belgili boldy. Máselen, «Tulpar» saýda ortalyǵynda avtojýý, «Tapchan-7» dámhanasy, «Doner Mıks» qoǵamdyq tamaqtaný orny, «Jiger» bılıard klýby jáne basqa da uıymdar jumystaryn jalǵastyra bergen. Rejımdi buzǵan menshik ıeleri, shaǵyn jáne orta bıznes sýbektilerine ákimshilik hattamalar toltyryldy. Atalǵan zańbuzýshylyqtar týraly materıaldardy elordanyń mamandandyrylǵan aýdanaralyq ákimshilik soty beınekonferentsııa rejıminde qarastyrǵanyn atap ótken jón.

Barlyq mekeme ıelerine 10 AEK mólsherinde ákimshilik aıyppul salyndy. Sonymen qatar reıd kezinde ýchaskelik polıtsııa ınspektorlary eriktilermen birge medıtsınalyq maskalar men antıseptıkterdi satýdyń zańsyz jaǵdaılaryn anyqtady. Quqyqbuzýshylardan 188 betperde jáne 112 dana antıseptıkter tárkilendi. Satýshylarǵa ákimshilik hattama toltyryldy.