Elordada «Media & Gov Connect» respýblıkalyq medıaforýmy ótti
ASTANA. KAZINFORM — Elordada memlekettik organdardyń baspasóz hatshylaryna arnalǵan «Media & Gov Connect» respýblıkalyq medıaforýmy uıymdastyryldy.
Іs-sharanyń ashylýynda Memlekettik qyzmet isteri agenttiginiń tóraǵasy Darhan Jazyqbaı medıa forýmnyń memlekettik organdar men qoǵam arasyndaǵy ashyq ári tıimdi kommýnıkatsııany nyǵaıtýdaǵy mańyzy jaıly aıtyp, elimizdegi memlekettik basqarý júıesin jańǵyrtýǵa baǵyttalǵan aýqymdy ózgeristerge toqtaldy.
— Konstıtýtsııalyq reformalar, saıası jáne ınstıtýtsıonaldyq jańǵyrý úderisteri, sondaı-aq «Memlekettik qyzmet týraly» jaqynda qabyldanǵan Zań memlekettik basqarýdyń jańa sapasyn aıqyndap, ashyqtyqqa, eseptilikke, kásibılikke jáne adamǵa baǵdarlanýǵa negizdelgen jańa basqarý mádenıetin qalyptastyrýdy kózdeıdi. Bul rette Prezıdent usynǵan «Halyq únine qulaq asatyn memleket» tujyrymdamasynyń mańyzy erekshe. Halyqpen ashyq ári senimdi dıalog — tıimdi memlekettik basqarýdyń basty sharttarynyń biri, — dedi agenttik tóraǵasy.
Sondaı-aq ol memlekettik qyzmettiń tıimdiligi qabyldanǵan sheshimderdiń nátıjesimen ǵana emes, qoǵammen ózara is-qımyldyń sapasymen de baǵalanatynyn aıtyp, ashyqtyq, eseptilik jáne keri baılanys memlekettik qyzmetshiniń kúndelikti jumysynyń ajyramas bóligine aınalýy tıis ekenin jetkizdi.
Mádenıet jáne aqparat birinshi vıtse-mınıstri Qanat Ysqaqov memlekettik organdardyń baspasóz hatshylarynyń qoǵam men bılik arasyndaǵy tıimdi baılanysty qamtamasyz etýdegi mańyzdy róline toqaldy.
Al Prezıdent janyndaǵy «OKQ» respýblıkalyq memlekettik mekemesiniń dırektory Asqar Omarov forým qatysýshylaryna aqparattyń ashyqtyǵy men jedeldigin arttyrý, memlekettik saıasatty halyqqa túsinikti jetkizý jáne kásibı medıakommýnıkatsııany damytý máseleleriniń ózektiligi jaıly baıandady.
Forýmda otandyq medıa salasynyń sarapshylary men zańgerler jasandy ıntellekt dáýirinde aqparat kózderimen tıimdi jumys isteý, aqparat taratý barysynda quqyqtyq jaýapkershilik pen medıasaýattylyq taqyrybynda sheberlik sabaqtaryn ótkizdi.
Memlekettik qyzmet isteri agenttigi men Mádenıet jáne aqparat mınıstrliginiń uıymdastyrýymen ótken medıaforýmǵa ortalyq jáne jergilikti memlekettik organdardan 70-ten astam baspasóz hatshy men PR salasynyń mamandary qatysty.
Medıaforýmnyń negizgi maqsaty — memlekettik organdardyń kommýnıkatsııalyq áleýetin arttyrý, baspasóz hatshylarynyń kásibı biliktiligin jetildirý jáne zamanaýı aqparattyq keńistikte tıimdi jumys júrgizýdiń ozyq tásilderin talqylaý.
Buǵan deıin eń tómengi jalaqy mólsheri jáne memlekettik qyzmetkershilerdiń jalaqysy ósimine qatysty materıal jarııalaǵanbyz.
