Elordada medbıkeler kúni atalyp ótýde
ASTANA. 12 mamyr. QazAqparat /Jasulan Amanbaıuly/ - Elordada Dúnıejúzilik medbıke kúnine oraı, «Astana qalasynyń 2011 jyldyń eń úzdik medbıkesi» baıqaýy ótýde.
Baıqaýǵa Astana qalasynyń barlyq medıtsınalyq uıymdarynan medbıkeler qatysýda.
Medbıkeler - qazirgi kezde densaýlyq saqtaý júıesiniń eń mańyzdy quramdas bir bóligi. Olar ózderiniń kúndelikti tájirıbesinde medıtsınalyq kómek kórsetý sapasyn arttyrý, medbıkelik kútimdi jetildirý jáne densaýlyq saqtaý júıesinde shyǵyndardy tómendetý baǵyty boıynsha aıtarlyqtaı úles qosýda. Osy bastamalardyń kópshiligi halyq densaýlyǵynyń nyǵaıýyna alyp keldi.
Búgingi tańda Dúnıejúzilik medbıke kúni kásiptik merekeler qatarynda bedeldi oryn alady. Qazirgi zamanǵy medbıkelerdiń mindetteri - otandyq densaýlyq saqtaýdaǵy eń jaqsy dástúrlerdi joǵaltpaı, álemdik tájirıbeni ıgerý.
Saltanatty shara barysynda Astana qalasynyń Densaýlyq saqtaý basqarmasy medbıkelerge qurmet gramotalaryn, aqshalaı jáne baǵaly syılyqtar tabys etti.
Medbıkelerdiń halyqaralyq kúni Qyrym soǵysy kezinde (1853-1856) álemdegi alǵashqy izgilik bıkeleriniń qyzmetin uıymdastyrǵan aǵylshyn medbıkesi Florens Naıtıngeıldiń týǵan kúnine oraı, 1971 jyldan beri atap ótiledi.
Ár eki jyl saıyn Halyqaralyq Qyzyl Krest jáne Qyzyl Jarty Aı qozǵalysy eń úzdik medbıkelerge Florens Naıtıngeıl atyndaǵy 50 medaldy tapsyrady.
