Elordada maıdangerlerge 1 mln teńgeden beriledi
«9 mamyrǵa aqshalaı tólem ardagerlerdiń jesirlerine, tyl eńbekkerlerine jáne basqa da birqatar sanattarǵa qarastyrylǵan. Jeńistiń 75 jyldyǵyn merekeleýge baılanysty Nur-Sultanda UOS qatysýshylary men múgedekteri 1 mln teńgeden alady. Qazirgi tańda elordada UOS 44 ardageri bar. Sonymen qatar, tyl eńbekkerleri, qaıtys bolǵan UOS múgedekteri men qatysýshylarynyń áıelderi, sondaı-aq jeńildikter men kepildikter boıynsha UOS ardagerlerine teńestirilgen barlyq adamdar da bir jolǵy aqshalaı tólem beriledi», delingen habarlamada.
Atap aıtqanda, jeńildikter men kepildikter boıynsha Ekinshi dúnıejúzilik soǵysqa qatysýshylar men múgedekterine teńestirilgen adamdarǵa – 75 myń teńgeden (405 adam), jeńildikter men kepildikter boıynsha soǵysqa qatysýshylarǵa teńestirilgen adamdarǵa, onyń ishinde qaza tapqan áskerı qyzmetshilerdiń otbasylaryna, soǵys jyldarynda qaıtys bolǵan UOS ardagerleriniń jesirlerine, tyl eńbekkerlerine – 32 500 teńgeden (3 529 adam) birjolǵy aqshalaı tólem qarastyrylǵan.
