Elordada «Maıdanger partızan» atty kitaptyń tanystyrylymy ótedi

ASTANA. QazAqparat - Erteń, 5 mamyr kúni (saǵat 16-00) Astana qalasyndaǵy Ulttyq akademııalyq kitaphanada Uly Otan soǵysynyń ardageri Rahmetolla Egizbaev týraly jazylǵan «Maıdanger partızan» kitabynyń tanystyrylymy ótedi. Bul jóninde QR Ulttyq akademııalyq kitaphanasynyń baspasóz qyzmeti habarlaıdy.

QR Mádenıet qaıratkeri, jýrnalıst Baıan Muhambetálıevtiń bul eńbegi Uly Jeńistiń 70 jyldyǵy qarsańynda jaryq kórip otyr.

Osy kitapta jaýynger Rahmetolla Egizbaevtyń Belarýs jerindegi partızandyq joly týraly baıandalady. Sonymen qatar oqqa oranǵan ottyń ortasynan aman-esen elge oralǵan soǵys sarbazynyń beıbit kezeńdegi ónegeli isteri jaıly syr shertken jerlesteri, qyzmettes áriptesteri men partızannyń otbasy músheleriniń úlgi tutarlyq estelikteri avtor Baıan Muhambetálıevtiń týyndysyna arqaý bolǵan. «Maıdanger partızan» kitabynyń «Dáıekke negiz derekter» men «Ónege toly estelikteri» atty eki bólimnen turýy osydan.

Al birinshi bólimniń «Dáıekke negiz derekter» dep atalýy kezdeısoq emes. Óıtkeni maıdanger partızannyń ózi de, onymen birge bolǵandar da ómirden ótip, jaryq dúnıemen qosh aıtysqan. Sondyqtan avtor Belarýs eline arnaıy baryp, memlekettik Ulttyq muraǵattaǵy partızandyq qozǵalys týraly materıaldarmen tanysqan. Ondaǵy Rahmetolla Egizbaevqa qatysty qujattarmen qatar, quramynda otandas jerlesimiz bolǵan «Chekıst» brıgadasy otrıadynyń erlik isteri de kitapqa engen. Belarýs Respýblıkasynyń Ulttyq muraǵatynda 370 myń partızan týraly málimet bar. Belarýs jerindegi partızandyq qozǵalysqa Qazaqstannyń da kóptegen jaýyngerler qatysty. Sonyń biri basty keıipker R.Egizbaev arqyly jańa kitapta nemis basqynshylaryna qarsy partızandyq kúreske zor úles qosqan qazaqstandyqtardyń erjúrektigi kórinis tapqan.

Avtordyń muraǵat qujattaryn zerdeleý nátıjeleri birinshi bólimge «Segiz jylǵa sozylǵan eki jyl», «Partızandyq ómir soqpaǵy», «Muratty kúnder muraǵaty» atty ataýlarda sıpattalady.

Ekinshi bólim maıdanger partızannyń týǵan elge 1947 jyly oralǵannan keıingi beıbit ómiri estelikter túrinde órilgen. Ony «Eshkimge jel bop tımegen», «Esten ketpes qyzmettes joldas», «Tálimdi tárbıe tiregi edi», «Áke qadiri» syndy ataýlardan turatyn estelik toptamalarynan ańǵarý qıyn emes.

Kitaptaǵy «Ákeler dańqy jolymen» jáne «Beıbit ómir beıneleri» atty toptamamen berilgen fotosýretter de shyǵarma mazmunyn asha túsedi. Taǵy bir aıta keterlik jaıt, «Maıdanger partızan» týyndysy birden orysshaǵa aýdarylyp, osy kitapqa enip otyr.

Bul - B.Muhambetálıevtyń jazýshylyq joldaǵy alǵashqy qadamy. Biraq ótken jyly onyń qurastyrýymen «Qazaqstan - Oral» telearnasynyń 50 jyldyǵyna oraı «Aqjaıyqtyń aınasy» atty kólemdi jınaq jaryq kórgen.

Kitaptyń tanystyrylymyna zııaly qaýym ókilderi shaqyrylyp otyr.