Elordada maýsym aıynda úı janýarlaryna qatysty jańa ereje shyǵady
ASTANA. QazAqparat - Astanada úı janýarlaryn ustaý jáne qańǵybas ıtterdi aýlaý boıynsha jańa erejeler engiziledi, dep habarlaıdy qala ákimdiginiń saıty .
«Astana vetservıs» ShJQ KMM dırektory Aıdarhan Arystanovtyń aıtýynsha, qalada úı janýarlaryn ustaý jáne qańǵybas ıtter men mysyqtardy aýlaý boıynsha jańa ereje 2017 jyldyń maýsym aıynan bastap engiziledi.
Qazirgi tańda elordada ıtterdi tumyldyryqsyz serýendetý, ıeleri úı janýarlarynyń nájisterin jınaýdan bas tartatyny, aýlalar men sport alańdarynda serýendetetini eń ózekti máselelerdiń biri bolyp otyr. Bul baǵytta Astana qalasy ІІD JPQ tabıǵatty qorǵaý polıtsııasynyń qyzmetkerleri ıelerimen jıi profılaktıkalyq jumystar júrgiziledi, alaıda máseleniń kúrmeýi tarqatylar emes.
Sol sebepti, osy jyldyń maýsym aıynan bastap mekeme mamandary jańa erejeler boıynsha jumys isteýdi kózdep otyr. Astanada ıtter men mysyqtardy ustaý jáne serýendetýge qatysty erejege birqatar ózgerister engizilgen. Onyń basym bóligi úı janýarlaryn uryqsyzdandyrý, sonymen qatar qańǵybas ıt pen mysyqtardy arnaıy dárimen qınamaı jansyzdandyrýǵa qatysty.
Buǵan qosa kásiporyn ókilderi qaýipsizdikti saqtaý maqsatynda talastyratyn ıtterdi tek 21 jasqa tolǵan adamdar ǵana ustaı alatynyn habarlady.
«It ıesi týraly ózgerister engizildi. Qoldanystaǵy erejede 14 jasqa tolǵan adamdar ıt ıeleri bola alady delingen, al endi 18 jasqa jetken azamattar erekshe jaýapkershilikti qajet etetin ıtterdiń ıeleri atana alady. Bul kúnge deıin «Ustaýǵa kónetin qala ıti» kýrsy boıynsha synaqtardan ótý kerek bolǵan edi, al jańa erejede osy kýrstan mindetti túrde ótý usynylady», - deıdi Aıdarhan Arystanov. Sonymen qatar qoldanystaǵy erejeden janýardyń parazıttik aýrýlarǵa tekserilýi tıis degen pýnkt alynyp tastaldy.
Qazirgi ýaqytta qalalyq janýarlar ustaıtyn oryn men tálimbaqtar sanyn kóbeıtýge bıýdjetten qarjy bólý qarastyrylady.
