Elordada maskasyz jolaýshylar avtobýstan túsiriledi
NUR-SULTAN. QazAqparat - Elordada qoǵamdyq kólikterde jolaýshylar maska taǵyp júrýge mindetti. Keri jaǵdaıda avtobýsqa otyrǵyzylmaıdy, dep habarlaıdy QazAqparat tilshisi.
CTS kompanııasynyń qyzmetkerleri tańǵy saǵat 6-dan bastap qoǵamdyq kólik toqtaǵansha jolaýshylarmen jumys jasaýda. Olar adamdardyń maska taǵýyn tekserip, saqttyq sharalaryn túsindirip jatyr.
«Jolaýshyda maska bolmaǵan jaǵdaıda avtobýstan túsýdi ótinemiz. Buǵan qosa, avtobýs ishi jolaýshyǵa 50 paıyz tolǵanda aıaldamaǵa toqtaǵanymen, aldyńǵy esigi ashylmaıdy. Júrgizýshi basqa jolaýshylardy shyǵarý úshin qalǵan esikterdi ashady. Bul sharalar qala turǵyndarynyń qaýipsizdigi úshin jasalady», - dep atap ótedi atalǵan kompanııadan.
Eskerińizge sala keteıik, 11 mamyrda elimizde tótenshe jaǵdaı rejımi alyndy. Epıdemııalogııalyq ahýaldyń jaqsarýyna baılanysty shekteý sharalary da birtindep jumsartylýda. Sol sebepti qoǵamdyq kóliktegi jolaýshylar sany artyp keledi. Máselen, avtobýstar baǵdarǵa shyqqan 12 mamyr kúni qoǵamdyq kólikterde 146 907 jolaýshy qatynasa 15 mamyrda adamdar sany 237 969-ǵa jetti. Qoǵamdyq kólik 15 mamyrdan bastap tańǵy saǵat 6-dan keshki 22:00-ge deıin júredi.
«Sanıtarlyq normalar buzylǵan jaǵdaıda qoǵamdyq kóliktiń qozǵalysy toqtap, qala karantınniń qatań sharalaryna qaıta oralýy múmkin», - dep eskertedi CTS kompanııasynda.
