Elordada mas júrgizýshi boıjetkendi qaǵyp ketti

NUR-SULTAN. QazAqparat – Elordada «Lexus» markaly avtokóliktiń júrgizýshisi Bókeıhan kóshesimen kele jatyp, joldyń júrý bóliginen ótip bara jatqan 24 jastaǵy qyzdy qaǵyp ketti, dep habarlaıdy QazAqparat Nur-Sultan qalalyq PD baspasóz qyzmetine silteme jasap.

Qujattaryn tekserý barysynda polıtsııa qyzmetkerleri 56 jastaǵy júrgizýshiden ishimdiktiń ısi shyǵyp turǵanyn baıqaǵan.

Medıtsınalyq saraptamanyń qorytyndysy boıynsha ol mas kúıinde bolǵan. Jol-kólik oqıǵasy saldarynan boıjetken dene jaraqatyn alyp, qalalyq aýrýhanaǵa jetkizildi. Medıtsınalyq kómek kórsetilgen soń ol aýrýhanadan shyǵaryldy. Atalǵan fakti boıynsha tergeý amaldary júrgizilýde.

Sol kúni túngi ýaqytta kýágerden polıtsııaǵa «Toıota kamrı» avtokóliginiń júrgizýshisi mas kúıinde kólik júrgizgeni týraly habarlama kelip tústi. 25 jastaǵy quqyq buzýshynyń ustalǵan sáti polıtseıdiń beınetirkeý quralyna jazylyp qalǵan. Medıtsınalyq saraptamaǵa sáıkes, júrgizýshi jeńil dárejede mas kúıde kólik júrgizgen.

Elordalyq polıtseıler úsh táýlikte 5 mas júrgizýshini ustaǵan. Barlyq júrgizýshiler jaýapqa tartyldy.

QR ÁQBtK-niń 608-babyna sáıkes, kólik quralyn mas kúıinde basqarǵany úshin ákimshilik sottyń sheshimimen tártip buzýshylar 15 táýlik merzimge qamaýǵa alynyp, jeti jyl merzimge júrgizýshi kýáliginen aıyryldy. Avtokólikter kommýnaldyq turaqqa ornalastyryldy.