Elordada mas júrgizýshi alty kólikti soǵyp baryp toqtady
NUR-SULTAN. QazAqparat - Elordada mas kúıde kólik basqarǵan júrgizýshi kólik turaǵynda turǵan 6 kólikke zaqym keltirdi, dep habarlaıdy QazAqparat qalalyq PD baspasóz qyzmetine silteme jasap.
Polıtsııa departamentiniń baspasóz qyzmeti taratqan málimetke saı, 16 sáýir kúni 01:00-de 33 jastaǵy júrgizýshi mas kúıde «Kıa» markaly kólikpen kele jatyp, Bógenbaı kóshesiniń boıyndaǵy kólik turaǵynda turǵan 6 kólikti soqqan.
«Apat saldarynan eshkim japa shekken joq. Osy is boıynsha júrgizýshige QR Ákimshilik quqyq buzýshylyq týraly kodeksiniń 608-babynyń 3-bóligi boıynsha is qozǵaldy. Sot úkimi boıynsha júrgizýshi kináli dep tanyldy. Ol 20 táýlikke qamaýǵa alynady jáne 7 jyl kólik júrgizý quqyǵynan aıyryldy. Kólik kommýnaldyq turaqqa qoıyldy» delingen habarlamada.
