Elordada mas kúıde kólik júrgizgen jasóspirim ustaldy
NUR-SULTAN. QazAqparat – Elordada kólikke mas kúıde otyrǵan jasóspirim ustaldy, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
«17 qazanda saǵat tańǵy beste polıtsııa Abaı dańǵylynda kámeletke tolmaǵan júrgizýshi júrgizip kele jatqan KIA CADENZA avtokóligin toqtatty. Ony tekserý kezinde baladan alkogoldiń ıisi baıqalǵan. Alaıda jas júrgizýshi alkogoldik ishimdik ishpegenin aıtty. Kámeletke tolmaǵan azamatqa qatysty QR ÁQBtK-niń 608-baby 8-bólimi boıynsha ákimshilik is qozǵaldy. Materıal Nur-Sultan qalasynyń ákimshilik sotyna jiberildi. Sonymen qatar buǵan deıin jas jigittiń mas kúıinde qoǵamdyq oryndarǵa júrgeni úshin jaýapkershilikke tartylǵany belgili boldy», - dep habarlaıdy departamentten.
Jasóspirimniń zańdy ókili de ákimshilik kodekstiń 440-baby 3-bóligi boıynsha (Alkogoldik ishimdikterdi ishý nemese qoǵamdyq oryndarǵa masań kúıde kelý) jaýapkershilikke tartyldy. Materıal protsessýaldy sheshim qabyldaý úshin Nur-Sultan qalasynyń ákimshilik sotyna joldandy.
Jalpy demalys kúnderi polıtsııa qyzmetkerleri júrgizýshilerdiń mas kúıde kólik júrgizýiniń 7 faktisin tirkegen.
«Senbi kúni saǵat túngi birde 37 jastaǵy júrgizýshi mas kúıde «NISSAN NP 300» avtokóligin júrgizip kele jatyp, «LEXUS GS 300» markaly avtokólikke soqtyǵysqan. Jol-kólik oqıǵasy saldarynan eshkim zardap shekken joq. Atalmysh júrgizýshige qatysty Ákimshilik kodekstiń 608-baby 3-bóligi boıynsha is qozǵaldy. Sot sheshimimen er adam 20 táýlikke qamalyp, 7 jylǵa kólik júrgizý quqyǵynan aıyryldy», - dedi departamentten.
