Elordada mas adam marshrýttyq avtobýsty aıdap áketken
NUR-SULTAN. QazAqparat – Elordada marshrýttyq avtobýsty urlap, aıdap ketken er adam ustaldy, dep habarlaıdy QazAqparat qalalyq polıtsııa departamentine silteme jasap.
«3 aqpan kúni saǵat 07:06-da «102» nómirine marshrýttyq avtobýs júrgizýshisinen shaǵym kelip tústi. Jetigen, 34 mekenjaıynda belgisiz er adam «MAN SL» markaly avtobýsty aıdap áketken. Júrgizýshiniń aıtýynsha, tańerteń avtobýsty otaldyryp, qyzdyrý úshin ýaqytsha qaldyrǵan. Ol dıspetcher bólimine kirip shyqqansha, kezdeısoq ótip bara jatqan er adam jolaýshylar avtobýsyn aıdap áketken», - dep habarlady Nur-Sultan qalalyq polıtsııa departamenti.
Biraq ol alysqa uzamaǵan. Tártip saqshylary saǵat 7:18-de vıdeobaqylaý kameralary arqyly ony Respýblıka dańǵyly men Y. Dúkenuly kóshesiniń qıylysynda ustady.
«Medıtsınalyq tekserý barysynda, 28 jastaǵy turǵynnyń alkogoldi ishimdikke ortasha deńgeıde mas bolǵany anyqtaldy. Atalǵan fakt boıynsha QR Qylmystyq kodeksiniń 200-baby, 1-bóligine sáıkes sotqa deıingi tergeý júrip jatyr», - deıdi departamenttiń baspasóz qyzmeti.
