Elordada Marat Ospanovqa arnalǵan kitaptyń tusaýkeseri ótti

NUR-SULTAN. QazAqparat - Búgin Májiliste Elbasynyń senimdi serigi, belgili memleket jáne qoǵam qaıratkeri, Parlament Májilisiniń alǵashqy Tóraǵasy, 20 jyl buryn dúnıeden ótken Marat Ospanovqa arnalǵan konferentsııa aıasynda «Otanǵa adal qyzmet etý» atty kitaptyń tusaýkeseri ótti, dep habarlaıdy QazAqparat tómengi paalatanyń baspasóz qyzmetine silteme jasap.

Іs-sharaǵa Májilis Tóraǵasy Nurlan Nyǵmatýlın, Parlament depýtattary, qoǵam qaıratkerleri jáne Marat Ospanovtyń otbasy, týǵan-týystary jáne jaqyndary qatysty.

«Marat Ospanov týraly estelikter bizdiń Qazaqstanymyzdyń egemendi el atanǵan tarıhı kezeńimen qatar júredi. Sebebi Marat Turdybekuly Tuńǵysh Prezıdentimiz - Elbasy Nursultan Ábishuly Nazarbaevtyń senimdi serigi bola júrip, táýelsizdikke jetý, ony qalyptastyrý jáne damytý jolynda aıanbaı eńbek etti», - dedi konferentsııany ashqan Májilis Tóraǵasy.

Marat Ospanovtyń mol bilimin, erekshe qabiletin, batyl minezi men úlken saıasat jolynda eńbek etip, otandyq parlamentarızmdi damytýǵa zor úles qosqanyn alǵa tartqan Nurlan Nyǵmatýlın onyń eńbek joly urpaqqa úlgi bolatynyn aıtty.

Marat Ospanov basqarǵan jyldary Parlament jan-jaqty jáne tabysty eńbek etti. Parlament 400-den astam zań qabyldady. Sol ýaqytta qabyldanǵan barlyq zańdarda, sonyń ishinde, ekonomıkalyq qujattarda Marat Turdybekulynyń qosqan úlesi zor jáne erekshe. Ol tek zań shyǵarý qyzmetimen aınalysyp qana qoımaı, mádenıet, sport salasyn nyǵaıtýǵa da belsene aralasty. Marat Ospanov – búkil ómirin egemen elimizdiń damýyna arnaǵan bilikti saıasatker, isker basshy, qaıratker tulǵa, dedi Palata Spıkeri.

M. Ospanovpen birge jumys istegen áriptesteri men dostarynyń estelikteri, Májiliste uıymdastyrylǵan fotokórme aıasynda ómiriniń jarqyn sátterin beıneleıtin kóptegen fotosýretter onyń joǵary adamgershilik jáne kásibı qasıetterin eske saldy.

Marat Turdybekuly Ospanov (17.09.1949 – 23.01.2000) – Qazaqstan Respýblıkasy Parlamenti Májilisiniń alǵashqy Tóraǵasy.

Tórt shaqyrylym depýtaty: Qazaq KSR-i Joǵary Keńesiniń HII-HIII shaqyrylymy jáne I jáne II shaqyrylymdaǵy QR Parlamenti Májilisiniń depýtaty.

Ekonomıka ǵylymdarynyń doktory.

Qazaqstan Respýblıkasy Salyq kodeksiniń, Táýelsiz Qazaqstannyń Deklaratsııasyn ázirleýge atsalysqan.

2-dárejeli «Barys» ordenimen marapattalǵan.