Elordada MÁMS boıynsha kelisim mindettemelerin oryndamaǵan 9 medıtsınalyq uıymǵa aıyppul salyndy

NUR-SULTAN. QazAqparat – Nur-Sultan qalasynda mindetti áleýmettik medıtsınalyq saqtandyrý aıasynda kelisim mindettemelerin oryndamaǵan 9 medıtsınalyq uıymǵa aıyppul salyndy. Bul týraly Mindetti áleýmettik saqtandyrý qorynyń Nur-Sultan qalalyq fılıalynyń dırektory Nurlybek Qabdyqaparov málim etti, dep habarlaıdy QazAqparat tilshisi.

«2020 jyly Nur-Sultan qalasy boıynsha kepildendirilgen tegin medıtsınalyq kómek kólemi 99,87 mlrd teńgeni, áleýmettik medıtsınalyq saqtandyrý kólemi 70,22 mlrd teńgeni qurady. Osylardy qosqanda jalpy soma – 170 mlrd teńgege jetip otyr. Qarjylandyrý kólemi 2019 jylǵa qaraǵanda 163 paıyzǵa kóp. 2020 jyldyń 9 aıynda josparly 111 mlrd teńgege qaraǵanda 96 mlrd teńgeniń (ıaǵnı 86 paıyz) qyzmeti kórsetildi. KTMK boıynsha 73 mlrd teńgeniki josparlanǵanymen, 68 mlrd teńgeniń qyzmeti kórsetilgen. MÁMS boıynsha bul kórsetkish 38 mlrd teńgelik jospar boıynsha 28 mlrd teńgeni qurap otyr», - dedi Nurlybek Qabdyqaparov qala ákimdiginiń Facebook paraqshasy arqyly kórsetilgen baspasóz máslıhatynda.

Fılıaldyń dırektory sonymen qatar 2017 jyldyń 1 shildesinen 2020 jyldyń 30 qyrkúıegine deıin Nur-Sultan qalasynan medıtsınalyq saqtandyrý qoryna 49 mlrd teńge aýdarylǵanyn málim etti. Olardyń ishinde jumys berýshilerden 41 mlrd teńge túsken. 2020 jyldyń 9 aıynyń ishinde elordalyq jumys berýshiler, jeke kásipkerler men azamattyq-quqyqtyq sıpattaǵy kelisimmen jumys isteıtin azamatattar qorǵa 19 mlrd teńge aýdarǵan.

Nurlybek Qabdyqaparovtyń aıtýynsha 2020 jyldyń 1 qańtarynan bastap 1 qarashasyna deıin halyqtan 928 shaǵym túsken. Olardyń 294-i qaralyp, nysandarǵa baryp tekserýdiń 9 monıtorıngi júrgizilgen. Monıtorıng nátıjesi boıynsha kelisim mindettemelerin oryndamaǵany úshin medıtsınalyq uıymdarǵa aıyppul sanktsııalary salynǵan. Bul baǵyttaǵy shaǵymdardy «Qoldaý 24» mobıldi qosymshasy arqyly «aı-kıý» júıesi boıynsha berýge bolady. Túsken shaǵymdar karantın shekteýine qaramastan taldanady.