Elordada MÁMS aıasynda 100-den astam medıtsına mekemesi qyzmet kórsetedi
Bul týraly Medıtsınalyq saqtandyrý qory Nur-Sultan qalasy boıynsha fılıalynyń dırektory Nurlybek Qabdyqaparov málim etti, dep habarlaıdy QazAqparat tilshisi.
«MÁMS júıesinde tólem jasaǵan árbir azamat qajetine qaraı em ala alady. Sondaı-aq, patsıentter úshin quny qymbat joǵary tehnologııalyq medıtsınalyq qyzmetter de tegin usynylady. Qazirgi ýaqytta medıtsınalyq qyzmet eki baǵyt boıynsha kórsetiledi. Ol aldymen tegin medıtsınalyq kómektiń kepildendirilgen kólemi (TMKKK) aıasynda jáne mindetti áleýmettik medıtsınalyq saqtandyrý (MÁMS) júıesi.
Dırektordyń aıtýynsha, elordada medıtsınalyq qyzmettiń sapasy men qoljetimdiligin arttyrý sharalary jalǵasady.
«Bıyl Medıtsınalyq saqtandyrý qory arqyly Nur-Sultan qalasy boıynsha 107 medıtsınalyq uıymmen kelisimshart jasaldy. Astanalyqtarǵa MÁMS aıasynda medıtsınalyq qyzmet kórsetetin bul mekemelerdiń 32-i – memlekettik, 67-si – jekemenshik, 8-i respýblıkalyq medıtsına uıymy. Onyń ishinde ambýlatorııalyq-emhanalyq kómek kórsetetin uıym – 36, táýlik boıy jumys isteıtin statsıonar – 29, statsıonardy almastyratyn kómek kórsetýshiler – 78 jáne konsýltatıvtik-dıagnostıkalyq kómek kórsetýshi – 12 medıtsınalyq mekeme bar», - deıdi ol.
Odan bólek, fılıal basshysy patsıenttiń medıtsınalyq saqtandyrýy bolmaǵannyń ózinde tegin medıtsınalyq kómektiń kepildik berilgen kólemi aıasyndaǵy medıtsınalyq qyzmetterdi tegin alý múmkindigi baryn aıtty.
