Elordada mamandandyrylǵan aýdanaralyq ákimshilik sotyna 24 myń talap-aryz túsken
ASTANA. KAZINFORM — Memlekettik organdarmen daý-damaı boıynsha ákimshilik isterde sheshimderdiń jartysynan astamy azamattar men bıznes ókilderiniń paıdasyna shyǵarylǵan.
Bul jóninde Astana qalasynyń kommýnıkatsııalar qyzmetinde ótken brıfıngte qalalyq sottyń ákimshilik ister jónindegi sot alqasynyń sýdıasy Aıym Shaıahmetova málimdedi.
— 2021-2026 jyldar aralyǵynda Astana qalasynyń mamandandyrylǵan aýdanaralyq ákimshilik sotyna 24 007 ákimshilik talap-aryz ben ótinish kelip túsken. Olardyń ishinde: sheshim shyǵarýmen qaralǵany — 7 004 is, qanaǵattandyrylǵany — 3 563 is, talaptardy qanaǵattandyrýdan bas tartylǵany — 3 441 is, medıatsııa tártibimen rettelgeni — 3 463 is; jalpy aıaqtalǵan óndirister sany — 21 327 is. Jalpy alǵanda, elordadaǵy memlekettik organdarmen daý-damaıda ákimshilik ister boıynsha qabyldanǵan sheshimderdiń 56 paıyzdan astamy azamattar men bıznes ókilderiniń paıdasyna shyǵarylǵan. Bul kórsetkishter ákimshilik ádilet buzylǵan quqyqtardy qalpyna keltirýdiń pármendi tetigine aınalǵanyn kórsetedi, — dedi ol.
Sonymen birge, Aıym Shaıahmetova tatýlastyrý rásimderiniń mańyzyn atap ótti.
— Sońǵy bes jylda Astana qalasynda 3,5 myńnan astam ákimshilik daý medıatsııalyq kelisimder men taraptardy tatýlastyrýdyń ózge de tásilderi arqyly sheshimin tapty. Mundaı tásil azamattar men memlekettik organdarǵa uzaqqa sozylatyn sot talqylaýynsyz ózara qolaıly sheshimge kelýge múmkindik beredi, áleýmettik shıelenisti tómendetip, sot júıesine degen senimdi arttyrady, — dedi ol.
Sondaı-aq, sońǵy bes jylda Astana qalasynyń mamandandyrylǵan aýdanaralyq ákimshilik soty protsestik mindetterin buzǵany jáne sot talaptaryn oryndamaǵany úshin 995 laýazymdy tulǵaǵa aqshalaı óndirip alý sharasyn qoldandy.
Aıta keteıik, buǵan deıin ákimshilik daýlardy sheshýde júıelilik qajet ekeni jónindegi Prezıdent málimdemesin jarııalaǵanbyz.
